Ki Bishop ka Northeast India da pynñiaw ki yei yatylli wa ki Christan ka Karnataka yow pyrchah yei wanrah ka sorkar Karnataka ya ka Bill yow khang yei pynkylla niam dei bor hapoh ka jylla.
U President ka North East India Regional Bishops’ Council, u Archbishop John Moolachira da ong u, “I yieñ lang i wa ki Christan ka Karnataka. I sñiawkhia yong ki man i leh i sñiawkhia yong i. Kani ka Anti-Conversion Bill iwa ka jylla da tyrwa ko wow wanrah toh kawa man pyrchah ya ki Christan kamjooh ya ki Hindu neibhah ka sorkar da ngait ko wa ki bru daw dai ki yei mynsien yong ki deiwa chah phon chah pynbiej”.
Da ong u wa ini i thmu toh iwa emlang wa iwa sih, “I ym em pyrchah i yei thmu ka sorkar wow thooh yutip bniah na ki Balang niam tangwa toh u man ko neibynta waroh ki niam ym toh du ki Christan donhi”.
U Archbishop da ban joor u leh yei hok wa da e da ka riti synchaar wa da e cha uwi pa uwi uwa chong chnong ka ri India. “Lada hadien wa da pyrkhat sani bha, tæ rai wow kylla niam, toh u em itæ i laitlooid hei pyrkhat, lada kwah wow kylla niam toh u em itæ i liatlooid. Ym em mo e ka riti synchaar yeini i hok?” da kylli u.
Deiwa pynsñiaw yeini i thmu ka sorkar, neiliang u President ka Arunachal Pradesh Catholic Association, u Taw Tebin da ong u, “Ym em wa ye u pynbor wow pynkylla niam ya kiwi. Ym toh ki Christan wa pynkylla niam yabor tangwa ka sorkar wa pynbor deiwa booh dei wym ye u pdiang hapoh ka riti synchaar wei man ko leh iwa ktah yei hok jied niam hapoh ka ri.”
Uwa e ktien ka United Christian Forum of North East India, u Allen Brooks da ong u, “Iyi wa jia hapoh ka ri da man ko leh pyrchah ya ka riti synchaar. Nga man ko kam u nong India ym toh neidaw ka niam tangwa nei hok wa kha hapoh ka ri wei i hok wa da e da ka riti synchaar. Iwa jia ha Karnataka wa Madhya Pradesh ha kini ki sngi toh yow pyntlot yei hok wa e ka riti synchaar hapoh ka ri waroh kawi.”
U Brooks da kylli u leh yei por wa da wanrah ya ini waroh. “Iyi i daw wa da khyndang ya kini ki phang manda chwa u em Election bait? Ini ym toh neidaw wa pynkylla niam yabor wei toh du wa da jan ka Election. Kam kini ki jait kaam daw phiah ko ya ki bru hajrong i niam wei daw mylliñ ya kiwi ki kaam wa emkaam wa ktah ya ka ri waroh kawi. Ini toh du wow yoh Vote donhi iwa da ktah yei sñiaw ki Christan kiwa wa maya yei suk i saaiñ hapoh ka ri”, da ong u.
Ka Sister Euginia Laloo, Social Communication Director ka Salesian Sisters ha Meghalaya da ong ko, “Ini toh iwa sñiawsih hawa ki Christan kiwa da e yarap bha yow tei ya ka ri nadooh ka puræ puthi waka sumaar sukhær, tangwa man-i-por da mang wow pyndik da ki sorkar wa ki seiñ wa em cha rood cha kiar ha kylleiñ ka ri. Ini i sdang ka sorkar daw pynchlur ko ya ki bru kiwa dang doom wow pynthut ki yei suk i saaiñ hapoh ka ri wei ye i wow pynyoh Vote tangwa katwon won i dooh nong?”.
Ki Christan ka Karnataka da kylli ki yei rukom pyrkhat ka sorkar wow tyrwa leh wow pynman sorjamin (Survey) yei katwon ngut em ki Christan wa ki kaam wa leh ki da ka Backward Classes and Minorities Welfare Department ka Karnataka ha ka 13 tarik uni u bnai.
Ya ini da pyrchah da ki Christan ka Karnataka iwa yahkhmat da u Archbishop Peter Machado, Metropolitan Archbishop of Bangalore.