Shillong : Ki le tylli ki seiñbhalang na ri-loom Jaiñtia kiwa kynthup ya ka Meghalaya People’s United Front (MPUF), the Khasi Jaiñtia National Union (KJNU) wa ka All Hynniewtrep People’s United Front (AHPUF) ynne ka sngi hei yaklam wa kiwa e khubor ha Shillong Press Club da pynsñiaw ki yei pyrchah joor yei thmu ka sorkar u kyrriah kaam ya u Arunkumar Kembhavi kam u DC ka WJH uwa kreh dang du chi snem chiteiñ donhi.
U president ka MPUF u Dapoiwanmi Laloo da ong u wa i kyrriah kaam ya u Kembhavi man i iwa khlem nonhrim neibhah oo samen ye sakhiat u wow chakri wei wow pyntoh pynbiang yei eh i khoo wa takhooh ki paidbah ka district.
Da ong chooh chooh u wa du hapoh kini ki kajak bnai da ye u Kembhavi u wanrah ya ka scheme na ka sorkar bei hei yatoh wa ka Solar Energy kawa kynjoh T. 6.04 klur wei da man u leh uwa chimkhia wow pynkhooid wei wow pynbait ya ka District Selection Committee (DSC) wa kiwi kiwi ki kaam hapoh ka district.
Kini ki le seiñ da ong wa ki ym em u pyrchah ki ya ka CCIB kamjooh leh sñiawthooh yei eh i khoo wa takhooh ki wa sah ha khappood, wei da ong ki wa u DC ym em u leh bakla u tangwa leh hi-eh u ya ka hukum na ka sorkar.
Da ong ki leh wa u DC da pyrchang u wow pyllai bait pyllai ryntih ya kiwa boon ki kaam nadooh kiwa chongdai harood sarok, i rukom kreh ki tnat sorkar, ki scheme SSA, wa kiwi kiwi khamtam yow pyndep noh yei kreh ha ka yingkieñ Kureliya, ha ka Wah Myntang.
Discussion about this post