Shillong: Kam wow kyrchaan yei yakhih ka Bar Council of India (BCI), ki dkhot yong ka Shillong Bar Association (SBA) ynne ka sngi da thang ki ya ka aiñ wa tip kam ka Advocates’ (Amendment) Bill, 2017 ha Shillong.
Ki dkhot ka SBA kiwa yalang ha khmat yung krehkaam ka Bar Association, ynne i janmiet da thang ki ya Bill kawa da pynkhreh da ka Law Commission kawa thmu wow phah cha ka sorkar wow pynman aiñ ya ka.
Hawa yaklam wa kiwa thoh khubor, u Kishore Chandra Gautam u General Secretary ka SBA da ong u wa ka Law Commission ka India da tyrwa ko wow kylla leh ya ka Advocates’ Act.
“Ha ini i kylla, ka Law Commission da kwah ko wow wanrah ya ki kyndon ki wow khanglaad ya ki muktiar wow pynman kaam yei dam kreh (Strike) ki” da ong u Gautam.
Da ong u leh wa ini i pynkylla ha kani ka aiñ kawa ong wa lada dam ki muktiar u yasaaid ki ha ki mukotduma daw ye wow chah ujor kylla ki ha ka pyrchah ya ki ha ki sngi wa yakhih ki.
Neini i daw da pynman ya ka yakhih wow pyrchah yei thmu ka sorkar .
Chooh chooh da ong u wa ini i tyrwa ka Law Commission da thmu leh wow booh ya ka Disciplinary Committee ka wow pait yei rukom krehkaam ki muktiar wei daw thung ya ki bru wow pynchitom ya ki muktiar ki wym tip ya ka aiñ.
Ha kani ka sngi leh ki muktiar da lai ki wow mih cha ka yung Kasari wei da ong wa daw pteiñ ki yei ya khih kawa joor ha kini ki sngi wow wan.
Discussion about this post