15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1
Advertisement ad1

Pyrchah ki Muster Roll yei pynkylla sop sop ka sorkar yaka aiñ khih mylla

1 Comment

Jowai: Ka seiñ All Jaiñtia Muster Roll Workers and Labour Union, Headquater Jowai ynne ka sngi da pynsñiaw ko yei pyrchah joor yaka sorkar jylla hajrong i tyrwa yong ka hapoh ka yung dorbar chna aiñ wow pynman aiñ yaka Meghalaya Labour Laws Amendment Bill 2020, deiwa kylli weileh waka sorkar chim ko wow wanrah ha kam ini i por, heiwa kam ki wakreh mylla sngi ki wakreh Muster Roll dang thooh laad thooh luti ki kammon u im.

“Kam ka seiñ sah i hei doom i lyngngoh neibhah waka sorkar thmu ko u pynman aiñ khlem i pynche paidbah chwa ya kiyi de ki bynta wa pynpsiah ko hapoh katai ka Bill. Ini toh i leh sop sop ka sorkar wei lai lait yaka synchaar paidbah,” ong u K.L. Pariat, President All Jaiñtia Muster Roll Workers and Labour Union.

Da ong haroh u yoosar em iyi re iyi cha lyndet neibhah wa ka sorkar murieh ko khlem i yachem  yumut wa ki seiñ waphær waphær ki wakreh neibynta ka imlang i bhalang ki wakreh mylla sngi, ki Muster Roll wei ini i leh ka sorkar pynchitom yumut ko yaki.

“Nadooh ka sorkar warim da em i tyrwa wa yaka bai mylla sngi Muster Roll toh u su 11 bnai heiwa ya u bnai December wym su de, hajrong ini da dep e ujor i cha u Conrad K Sangma ha u snem wa dep, tangwa ha kani ka kynti da thmu u pynkylla yaka aiñ. Kamtæ tieñ i ya boi kam kini ye u pynpsiah, te lada pdiang ki daw ktah joor bha ko ya kiwa mylla sngi waki Muster Roll wa em hapoh ka sorkar,” pynrap u K.L. Pariat.

Neitæ tieñ haroh ki ya i pynjrong ka sorkar yaki kynta kreh yong ki Muster Roll waki mylla sngi, neibhah hadooh kamwa man katni hap ki wow kreh 8 kynta chisngi, tangwa katkam ka khubor chawah chaneiñ da ong wa ye ki u pynboon hadooh 12 kynta.

Nalor kini tieñ ki leh ya boi em sa kiwi kiwi de ki kyndon waka sorkar kwah ko u murieh wei ye ko u  ktah bha ya ki wakreh.

Kamtæ heiyatoh wa ini da kyrpaad ki ya u Governor ka jylla wa u President ka ri wow dam ki u e i mynjur ya kani ka Bill khlem da em i yachem yumut chwa waki seiñ waphær waphær wakreh neibynta ki Muster Roll næ kiwa khih mylla sngi, wei emkaam wow pynche paidbah leh yaki phang wa kwah u pynpsiah thymme.

Da emlang ha kani ka sngi ka General Secretary ka M. Bareh, Vice President Jowai Unit P. Sutnga, General Secretary EJH B. Dhar, Vice President Jowai Polytechnic D. Bthuh, Treasurer Central Body ka Lana Kyndiah.

Previous
Next

1 Comment

  • May 21, 2020 at 5:07 am
    Meri

    I leh pyrcha i ni wa leh ka sorkar ia ki muster roll kam ni dei wa ong i tia cha khmat sein muster roll hei ia luti iong u ma k l pariat wa man kam u President ..ku chaphrang

    Reply

Leave a Reply