Ki soo seiñ wa kynthup ya ka HNYF, HANM, RJYF wa HNYM, ynne da phah chithi ki cha u Member Secretary ka Meghalaya State Pollution Control Board lyngba u DC ka East Jaiñtia Hills District yow pyrchah yei thmu wow pynmih thymme sa kawi ka karkhana pynmih khyndaw-bilat (Cement Factory) ha chnong Wahiajer, East Jaiñtia Hills kawa tip kam ka Meghatop Cement Pvt. Ltd.
Kam chibynta wow paan bor yow ye u sdang ya kani ka karkhana wa thymme, neiliang ka Pollution Board daw pynman ko ya ka Public Hearing ha ka 18 tarik uni u bnai heiwa ki soo seiñ da pyrchah ki yei pynman ya kani ka pynsñiaw paidbah.
Da ong wa ki daw wa pyrchah toh kattæ da em chwa 10 tylli ki Cement Factory hapoh ka Elaka Narpuh kiwa da ktah ya ka la’ær, ki um ki wah, ki khloo ki kjam deilang ki mrad ki mreng najrong wa dadep chah ktah chwa ka wah Lunar wa wah Lukha wei ha kani ka thaaiñ em leh ka Narpuh Reserve Forest deilang ka Narpuh Wildlife Sanctuary.
Da e nongmuna leh yei wym em ye kini ki karkhana wow wanrah i kylla wa bha ha ka imlang sahlang kamjooh leh ym ye ki wow e kreh ya ki khynroo khyllood kamjooh u pyndap ya iwa emkaam kiwa chong chnong deiwa yoh laad kini ki karkhana u leh katwa ngait ki.
Chooh chooh da ong leh wa i bai khyndaw-bilat toh iwa syat bha hapoh ka District iwa Rs. 450 chi churia i wym yahaap neibhah ya ini i mar da pynmih pyn hapoh ka District.
Da kyntu leh ya ka sorkar wow pynchitom ko ya kini ki karkhana lada ym ye ki u e kreh 100% ya ki khynroo khyllood wei lada ym ye ki wow pynhiar dor ya i khyndaw-bilat.
Discussion about this post