Jowai: Ka seiñ Confederation of Ri Jaiñtia Movement (CRJM), ynne ka sngi da lai booh dorkhat ko ha u Deputy Commissioner West Jaiñtia Hills District u R. Rapthap kamjooh ha u Superintendent of Police WJH, hajrong ka yurim wa pyrchah ka seiñ wow dai kiad ha ka tamasa wa tip kam ka NH7 Bacardi Weekender Festival, ka wow man ha kani ka 27 wa 28 ha Lad Mukhla West Jaiñtia Hills District.
Neiliang u President ka seiñ u Wandahun Suchiang da ong u wa pyrchah ka seiñ wow dai kiad ha ki tai ki ar sngi wa toh daw mih boon ki kynrum kynram iwa wanrah i ma khamtam ya ki kynthai. Da ong waka seiñ da jooh yoo ko wa jooh mih ki kulamar neidaw wa joor ka dih kiad palatpood ha kam kini ki jait tamasa.
Ka seiñ ym kwah ko u yoo ya kam ini iwa ktah ya ka akor burom ka jaitbru wei ha kani ka tamasa daw wan ki hajar ngut ki bru na kylleiñ ka ri wei ka seiñ kwah ko u yada ya ka burom ka akor ka ri-loom Jaiñtia.
U Batki Sari, Vice President da ong wa lada elaad wow dai kiad da tikna wow mih i kulmar wei ka chnong Lad Mukhla toh man ko kawi na ki chnong wa yieñ pyrchah yei dai kiad wa kiwi ki jait dih wa pynmuaid.
Da pteiñ u deiwa ong waka seiñ ym em pyrchah ko yei wan ka NH7 tangwa yieñ pyrchah ko du yei dai kiad kamjooh wa wai ya kiwi ki thaw dai kiad kam ki Bar ha ki tai ki sngi.
Kamtæ neiliang ka seiñ ngait skem ko wa ki bor yong ka aiñ u leh ki ya iwa emkaam katkam ka dorkhat wa da e ha ki.
Also Read: Dawa ka HNYF na u DC ka WJH wymhoi u chah dai kiad ha ki sngi wa pynman ya ka NH7
Discussion about this post