Kiwa yahkhmat ka Elaka Nartiang deilang waka seiñ JSM Mynsngad Unit ynne ka sngi da hiar lai pait ki yei thaw nohjhep thymme ka Jowai Municipal Board wa em ha uwi u loom hajan ka chnong Thadmusem, heiwa da pynsñiaw ki yei pyrchah deiwa ong wa yeini da leh khlem i tip paidbah namo khlem pynman Public Hearing kamjooh leh khlem i tip u Dolloi neibhah kani ka thaw dang haap ko hapoh ka Elaka Nartiang.
Heini i hiar lai pait da emlang u Acting Dolloi ka Elaka Nartiang u Kloi Pale, u Katbanbiang Lamare dkhot ka ka Elaka, u President ka JSM Mynsngad Unit, u P. Suting wa kiwi.
Da ong haroh ki wa najrong wa wan noh yei jhep ha kani ka thaw khlem i tip u paidbah waka Elaka, da chem ki wa i rukom noh leh man i i wym biang, wa hei sakhiat ong ki toh u chna hei dur i rukom wa miat, nadooh i rukom kær, i rukom wow thang jhep khnang yow lait chah ktah ki soodong sookun.
Da pynbaad haroh ki wa ini da man i leh sop sop donhi khlem da ap yei sur ki paidbah lada pdiang hi ki mo yeini.
“Nadooh nachwa da tip wa ka Elaka Nartiang toh kawa em naam kamtæ ym em kwah i u wan i jhep i tngit ha i, la toh iwa ye pathan tæ wanrah da ki thaw puræ wapher wapher, ki chnat krehkaam sorkar yow im ka Elaka waka jaitbru,” ong u Katbanbiang Lamare.
U Acting Dolloi khana u i daw wa wan pait ki toh wym em yoh u kawon kawon ka yutip næ ki kot ki sla heiyatoh wa kani ka thaw nohjhep wei ym em sñiaw yahaap ya ini i rukom leh.
U President ka JSM Mynsngad Unit, u P. Suting khana u wa hadien wa yoh yutip ki naki marjan chnong wa li noh jhep ki haka chnong Thadmusem, manda lai pait yoo ki wa man i ktah yaka imlang sahlang, neibhah manda wan u slap daw rah ki yeitu i jhep i jakhlia neidaw wa yei jhep da noh ha khlieh loom. Heijooh i por da ong u wa lada pdiang ki paidbah yeini i thaw, hap wow leh yeiwa emkaam, kam wow kær wei booh tyndur thang jhep wa kiwi de.
Hei yaklam kini kiwa yahkhmat ka Elaka wa u tre thaw, da khana u wa yeini i thaw da dai u neidaw wa emkaam poisa kamjooh leh wa joor ware sñiaw wyrai u yei kyrpaad u Chairman ka JMB wym yoh thaw nohjhep ki Jowai deiwa pynrap wa kamwa man kattæ ka JMB da su ko dei yong sien noh jhep (Per Trip) wei lada ym ye ki wow su ya ka bai thaw ye u wow phah dam noh yeini iwa pynbait neibhah wa ym pu em dep wow thied hiwot yei thaw wei kattæ dang man kamwa chim wai donhi.
Ki wakreh ka Municipal da pyntip ki wa yei jhep toh iwa da noh hapoh ki thlu wa da dep tih, dep te thang wei daw tymmoh biang dei khyndaw yei jhep.
Puræ leh: Da yoh yei thaw noh jhep wa heh 100 Acre neibynta ka chnong Jowai: Wailadmiki
