Shilong: Ka Khasi Student’s Union (KSU) Narpuh Circle da pyrchah joor ko yei thmu wow pynyaar ya ka paar tih moochuni ka Star Cement Ltd. ha ka chnong Brichyrnot, East Jaiñtia Hills District ha i thaw wa heh hadooh 42.051 hectare. Ka seiñ ynne da booh dorkhat ko leh ha u Member Secretary ka Meghalaya State Pollution Control Board wow pyrchah yeini i thmu.
Hawa yaklam wa kiwa pathai khubor ynne ka sngi, u President ka KSU Narpuh, u Kwilnis S. Suchiang da ong u wa ka seiñ da pyrchah ko ya ini i thmu neibhah daw ktah ko ya ki wah wa em ha kani ka thaw khamtam ya ka wah Lukha wa ka wah Lunar kawa jngai du kamwa 500 meter na kani ka paar.
Da ong u wa lada elaad ya kani ka karkhana wow tih moochuni, ka wah Lunar waka wah Lukha daw doohjait hi noh ki neibhah katkam wa man katni kini ki wah ym man de ki kiwa ye u pynemkaam da ki paidbah.
U heh ka KSU da sñiawphylla ko wa neiliang u Member Secretary ka MSPCB uwa da ong wa ka Board ym em kitkhlieh ko yei tngit kini ki wah tangwa ka Board pait ko du ya ki jakhlia ki tngit wa mih na i tih moochuni wei wow pyntip won cha ka chnat khloo.
U Suchiang da ong u wa lada elaad ya katai ka karkhana wow pynyaar ya ka paar daw ktha ko leh ya ka Narpuh Wildlife Sanctuary kawa em hajan kani ka paar kawa man ka thaw kawa da pynneh kyrpang neibynta ki mrad wa im ha ka heiwa kiwa boon hi da jan doohjait ki.
Chooh chooh da ong u wa ki karkhana wa tih moochuni ha ka thaaiñ Narpuh ym em ki ya ki Effluent Treatment Plant (ETP) wow yada nei pyntooid ya ki jakhlia cha ki wah, iwa ye u wanrah yei maa wa khroo ya kiwa em ha ka rymaw ha kani ka thaaiñ.
Heijooh i por, u Suchiang da ong u wa ka seiñ pyrchah ko leh yei thmu wow pynman ya i pynsñiaw paidbah neibhah kiwa boon ki paidbah ym tip ki yei chah ktah lada tih moochuni wei ye ki wow chah pynbiej hi-eh ki.
Discussion about this post