15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

Hadien wa ujor ki seiñbhalang ekti ka KHADC ha ka Hima wow kynreh ya ki baar jylla ha Shahlang

0 Comments

Shillong: Ka chnat wa pait ya ki yaw ki haat ka Khasi Hills Autonomous District Council (KHADC) da phah ko ya ki bor synchaar ka Hima Nongstoin wow kynreh ya ki baar jylla khamtam ha ka thaaiñ Shahlang wow tip wa wan ki neiwon khnang wow pynbiang ki ya ki kot ki sla yong ki katkam ka aiñ.

Hajrong ini, u Executive Member wa pait ya ka yaw ka KHADC, u Jambor War da khut u ya ka Hima Nongstion wa da mihkhmat da u Secretary ka Hima hadien wa ka KHADC da yoh ujor ko na ki seiñbhalang wa kynthup ya ka HYC, HANM wa ka WYF hajrong i roi ki baar jylla ha ka thaaiñ Shahlang wei khamtam hapoh ka yaw Shahlang, kawa haap ha ka Hima Nongstoin.

Hadien ka yalang neiliang u Jambor da ong u wa ka yaw Shahlang toh kawi na ki thaw wa roi bha ki baar jylla kiwa chong yaw wei katkam wa pyntip ka Hima i em ki baar jylla ha kani ka thaaiñ toh nadooh ki phaw snem nachwa.

U EM da ong u wa da phah pynkrehkaam ya ka Hima da ka Administration of Nongstoin Syiemship Rule 2006, kawa khang ya u dkhar mo u baar jylla wow chong næ khih mylla u hapoh kani ka Hima wei da ekti ha ka Hima wow lai thooh bniah wei wow phah ya ki bru wow wanrah ki kot ki sla næ pynsakhiat na ki pulit yong ki jylla wa wan ki.

Heiyatoh won wa ki baar jylla wa lai khih mylla heh cha kani ka thaw, ka Council da phah ko ya ka Hima wow yaleh ki ya ki kot Labour Licence na ka KHADC, katwa ya kiwa khayi da phah wow yoh Trading Licence ki na ka Council.

Hajrong i man i long ka yaw Shahlang ka wympu yoh i tipmit na ka KHADC, da hukum ya ka Hima wow phah ya ka Market Committee ka yaw Shahlang wow chim ya ka NOC na ka chnong wa ka Hima wei wow leh katkam ki kyndon ka Council.

Hadooh katni ka yaw Shahlang da pynlai da ka kur Sohbar wa Songsak kawa da em nadooh nachwa tangwa ympu yohbor ko na ka Council. Ka Hima da paan ko ya ka bui na ka Market Committee kawa pait ya kani ka yaaw Shahlang wei yeini daw pyntip won cha ka KHADC.

Heijooh i por ka Council leh da phah ko wow pyndam noh ya waroh i pynemkaam Plastic ha waroh ki yaw ka Hima kamwa da pynmih hukum ka KHADC ha u bnai wa dadep.

Previous
Next

0 Comments

Leave a Reply