Jowai: Ki ar tylli ki seiñ kiwa kreh yow yada yaka rymaw ha ki ar District ka ri-loom Jaiñtia da pynsñiaw ki yei pyrchah yei thmu ka Star Cement wow thih moochuni ha Brichyrnot, EJH. Kini ki ar seiñ toh kiwa kreh ha ki jar jiar ki bynta da pyrchah joor ki ya ini i tih moochuni neidaw wa daw ktah joor ko ya rymaw katai ka thaaiñ.
Ka Jaiñtia Fishing and Environment Protection Association (JFEPA) toh ka seiñ kawa da yoh khusnma naka Ministry of Water Resources ya ki kaam wa da leh ko yow yada ya ki um ki wah kamjooh ya ki doh um katwa ka Jaiñtia Tourism and Environment Society (JTES) toh kawa sdang nyngkong yow pynku ya ki kaam uiñke suwari hapoh ka ri-loom Jaiñtia, wei da thoh ki jar jiar cha u Member Secretary ka Meghalaya State Pollution Control Board, Shillong yow pynsñiaw yei pyrchah yong ki yei tih moochuni ka Star Cement ha Brichyrnot.
Ka JFEPA da ong ko wa kani ka thaw tih moochuni em ko hajan ka wah Lukha wei ka Brichyrnot man ko kam kawi na ki thaw wa em ki um wa tooid cha ka wah Lukha wei lada chah u tih moochuni daw ktah bha ko yaka wah, ki dakha wa kiwi kiwa em hapoh yong ka.
Da ong chooh chooh wa manda chah ktah ka wah Lukha daw chah ktah leh ki chnong wa emkaam yaka kiwa kyrchaan ha ki dakha yow yoh ki u im.
Neiliang ka (JTES) won da ong ko wa hadien wa dep pynman ko boon ki tamasa wa yatoh waka kaam uiñke suwari kam ka Discover Jaintia Festival ha East wa West Jaiñtia yow pynku yaka kaam uiñke suwari da chem toh wa ka ri-loom Jaiñtia toh kawa da kyrkhu da ka bei rymaw kiwa ye wow pynemkaam kam ki thaw uiñke suwari kiwa daw e kylla da ki kaam ki jaam ya ki paidbah kawa man kawi na ki laad kamai hapoh ka jylla katni.
Da ong chooh chooh wa ka Lumchnong toh kawa da kyrkhu da ki krem wa pawnaam hapoh ka pyrthai tangwa iwa sñiawsih toh kam ka Krem Kotsati Umlawan, Lumchnong da chah ktah ko nei tih moochuni.
Ka JTES da ong ko leh wa kmen ko u yoo wa ki khynroo khyllood ka Sonapyrdi da pynman ki ya ki tamasa uiñke suwari wei kani ka thaaiñ da em ko leh yaka Wildlife Sanctuary wei ka wah Luka ye ko u pynku yaka Ecotourism ha kani ka thaaiñ kawa daw e kreh leh ya ki khynroo khyllood.
Kamtæ ka seiñ da sñiaw ko wa lada chah yaka tih moochuni u lai ko chakhmat daw ktah ym du yaka laad kamai ki khynroo khyllood, daw ktah ko leh yaka chait ka khiah ki paidbah neidaw wa i tih moochuni pynmih ko chiboon ki pum pum wa daw ktah yaka wah kamjooh ya ki mrad khloo.
Discussion about this post