Jowai: Hadien wa mih ki seiñ wow dawa kyrriah ya ka yung krehkaam ka PWD Jowai North Division cha Shangpung, ynne ka sngi neiliang u MLA ka Jowai Constituency, u Wailadmiki Shylla da pynsñiaw u yei pyrhah hajrong ini i thmu.
Da ong u wa ini i dawa yong ka Synjuk ki Waheh Chnong wa ki seiñbhalang da man i iwa khlem pyrkhat jngai, neibhah katkam wa man katni emkaam wow chna thymme namo wow pynmih da ka yung krehkaam (Division) wa thymme.
Chooh chooh u Wailadmiki da ong u wa ymye u kyntait yeini i dawa neibhah wa ki thaw wa ki chnong wa haap hapoh kani ka Division man ki kiwa boon wei kiwa heh tangwa ym sñiaw yahap wow dawa kyrriah ya ka na Jowai.
Da pyntip u leh wa hei yaklam wa ki heh ka chnat kamjooh leh ya u montri rangbah ka jylla, u Conrad Sangma da pyntip u wa daw pyrkhat yeini neibhah katkam wa man hi emkaam wow yaleh chwa pyrchah ya ka khlam u COVID-19.
