Da: U Khroo L Pariat
Ini i chah pyndooh bordiñ ha ka sorkar hadooh wa ka yung krehkaam u SDO (E) PHE Jowai ym ye de ko u pynpoi um cha ki paidbah khamtam ha Jowai da toh u man ko ka nongmuna ya kitu ki chnong kam ka Rymbai, Khliehriat, Shangpung, Raliang, Wahiajer, Ummulong, Amlarem wa kiwi kiwa daw sdang u chkæh um na ka kor sorkar.
Ini iwa jia da sdang i u ktah ya i rukom im ki paidbah, da sdang ki u jynjar khamtam ha kitu kiwa duna wa tymbuiñ wa khian i kamai poisa, i jooh ka mynried ki pli ki khynnah kiwa khih i sngi, yakhun won ki pli u lai puræ dei janmiet ha ki skur miet kiwa pynlai da ki chnong ki seiñ ha Jowai.
Tangwa, ini iwa jia iwa yoosuk leh chi rukom hi, i yoomaa leh da em hi hadooh ynne wym em kiwon kiwon kiwa klam pyrchah heiyatoh wa ini i jia pyndooh bordiñ wa i pyndooh umkor.
Ka daw boi ymtoh ka mat kawa emkaam (Issue), kawa pynmih poisa namo wa da kut ka Election tæ ym emkaam Vote de namo ym toh kawa pynyaphær jaitbru ne wa ktah ya i ngait niam. Ym tip de boi ha kini ki sngi wow wan daw pynmih ki deiwi tawon i jia tang yow mylliñ chooh ki paidbah ya ini i pyndooh bordiñ i dooh umkor namo iwa jia ha MeCEL?
I pyndooh bordiñ nadooh i por 7 hadooh 8 waje i miet, nadooh 11:00 waje i miet hadooh 5:00 waje i step neitæ 11 waje i step hadooh 12:00 waje pyrdi sngi da chem jynjar bha ki paidbah wa kiwa sah wa im ha Jowai, khamtam kiwa khih wa mylla wa duna i kamai poisa kiwa dang chkeh um na ka PHE wa ki pli ki khynnah puræ skur miet. Sñiawthooh i wa u SDO (E) PHE Jowai namo ka PHE kawa saam um ym ye de ki u taan um khlem ka bordiñ.
Kyrmen O wa ymhoi u wan jia i raw um namo i yaknieh um ha i heini ha Jowai hadooh wa u man kam cha kiwi tawon ki jylla, hadooh wa em ki damok (Mafia) kiwa pynlai ya i ya dai ya thied um cha ki paidbah.
Ha i ujor O ha uwi u waheh ka chnat sorkar ha West Jaiñtia District, da khana wa wan donhi i pyntip wa da pyndooh bordiñ khlem da paan de ya i por iwa daw ktah ya ki paidbah khamtam ka um wa saam na ka PHE ya kiwa chong chnong ka Jowai. Manda wan jia ini i pyndooh bordiñ syndet ka sorkar wa da yahkhmat da ka NPP ya ka MDA-2.0 hadooh wa da sdang i im dei jynjar neidaw wa ympoi um de kamwa jooh poi, toh u kynmoo i ya ki kyntien u Amit Shah, u Montri kaam pohyung ka sorkar India wa yalam da ka BJP ya ka NDA 2.0, uwa da klam ha kawi ka rynsan yalap Election MLA ha kani ka jylla, “Wa ka MeECL, daw pynthyllem hi ko pyn da ka ya ka hi, wa yatooh tangka, i ya baamklep, i ya pynemkaam bakla ya ka poisa da man i iwa da palat ware ha katai ka chnat saam bordiñ”, iwa du hadien chi bnai donhi, jia sakhiat i pyndooh syndet ka sorkar ya ka bordiñ, dooh won sa ka um.
Ha Jowai da boon bha ki thlu yung kiwa chkeh umkor na ka thaw saam um ka PHE, manda dooh bordiñ i saam um leh dooh wot. Kiwa yoh u thied um da yoh um, katwa kiwa boon ym yoh ki u thied um man-i-por, kattæ da man i dooh thiah dooh dem khamtam ka manbei ka kynthai kawa sait kawa khleiñ, wa chet wa tu. Kamtæ ini i jia ha Jowai da toh u man ka nongmuna ya kitu ki yung ki chnong kiwa daw chkæh um na ka kor sorkar.
Kamtæ yow biang ka um ka bordiñ ymtoh de ka kaam samen tangwa da dawa ko ya waroh wow yakrehlang. Kyrpaad O ya phi ki khynroo khyllood, ki waheh wa sian, sñiawbha yarap lang yow yaleh u pynbha u sumaar ya ki um changpet, ki um changiar, ki thlu um, ki tyllong um, ki thwai ki wah khamtam ki tawiar ya ka chnong kam ka Syiem Myntdu ha Jowai, ka Kupli, ka Umngot, ka Myntang, Ka Mynriang wa kiwi ki thwai. Hawa kut hi, ym ye tang u dih da ka poisa, u baam da ka um.
Kynmoo bha lada kwah u laitlooid na i chah khoom- ka um wa ka bordiñ katni da man ki i mynsien i im yong i ki bru, ka yong i ki paidbah, u sumaar u pynbha chirup wa ka chnong wa ka ri India waroh kawi.
