I pynsñiawthooh paidbah hajrong i maa wa mih neiwa dih drug wei kammon u kiar na kini ki jait dih wa da pynman da ka yung krehkaam u OC ka Jowai Police Station chirup i krehlang waka Mihmyntdu Community Social Welfare Association (MCSWA) da pteiñ ki na kawi ka thaw cha kiwi won, wei ynne i janmiet da pynman ki ha chnong Mihmyntdu, West Jaiñtia Hills District.
Ha kani ka pynsñiawthooh paidbah, u H. Syngkon kam uwi wada lait nei drugs la 8 snem kattu, da phla u yei jinjar wa maad u ha ki snem wa chah kdoh chah khom u hei drugs.
Ong haroh u wa i ngop drugs yong oo da ktah ko yei bor i doh i pran, i bor pyrkhat wei mynsien sñiawlem ha oo, heijooh i por chah ktah leh ka yung ka sem yong oo kamjooh ka imlang sahlang ha kiwa boon rukom.
Khana u wa ha u snem 1999 da maad drugs u deiwa chah pynbiej haki lok kamjooh wa sñiaw khaiñ, sñiaw sarong yei dih drugs.
Wei hadien wa lai ki por ki sngi sdang sñiawthooh u wada chah kdoh chah khoom u hei drugs heiwa i doh i pran yong oo ym hoi de u dooh drugs hadooh wada chah ktah u wot hei bor pyrkhat wei bor sñiawlem iwa da pynman ya oo wow leh kut jait wot hadooh wow tooh leh tang yow yoh poisa lai thied drug.
Hapyrdi i jinjar wa maad u nei chah synchaar hei drug da ki phaw snem da chim noh u yei rai kut u dam syndon noh, kamtæ embhah u lyngba i yoh dawai naka MCSWA deilang i e mynsien ki lok ki jor, kiwa ha-yung ha-sem da lait u katni la 8 snem.
Kyntu haroh u ya kiwi wym pu maad, wow dam hi wot ki u pyrchang yaboi maad ki yei jinjar wa kthang, katwa ya kitu wa da ngop won u sñiawbha ki u wan chakhmat neibynta u yoh ki laad yarap deilang ki dawai mynkna napoh ka MCSWA.
Ha ka yalang wa pynlai da u O.C. Jowai Police Station, u S. Mannar da yoh leh i klam na ka P. Sumer, Outreach Worker MCSWA, na u D. Lamare, In-Charge Traffic Jowai, katwa ka I. Kharpran, O.C. Women’s Police Station Jowai kyntu ko ya ki paidbah u chimbynta ki haka yakob chna Video hajrong ka phang “Drug Abuse and Illicit Trafficking” heiwa kiwa jop daw yoh ki leh yaka song poisa.
