Ka Moolamanoh Sport Club da rah biang ko ya ka “SAHLYNGKHOT LYNGDOH LUMPUTHOI MEMORIAL KNOCK-OUT FOOTBALL TOURNAMENT” kawa tip leh kam ka “15th Prize Money Invitation Knock-Out Football Tournament-2024” kawa pynman da ka Lumputhoi Sport Club. Ka Moolamanoh da yoh ko u rah yei naam Champion hadooh le sien lynter kitæ ha u snem 2022, 2023 wa 2024.
Ya kani ka Tournament da wan wow pynhaap pyrda da u muktiar yasaaid aiñ wa bna naam bha ka East Jaiñtia, u Kerlang Ksoo kam u kongsan wei uwa ka-it bha u klam ya ki mat ki jura yong ka jaitbru ka Bri U Ynñiawtrep Ynñiawskum heiwa da sneiñ da kyntu u ya kiwa ksohkaam ka Lumputhoi Sport Club wow thooh chooh chooh ki laad ki luti wow pynmiat pynbha ya ka yalehke (Football) najrong ki kaam imlang sahlang, neibhah lyngba ka yalehke Football pynyajan yajooh ko hapyrdi kiwa yalehke kiwa wan na kylleiñ ki thaw, khamtam ki paramarjan chnong kiwa da ya chimbynta ha kani ka Tournament ha Lumputhoi.
Da ong haroh u hawa chim ya ka kaam imlang sahlang emkaam wow em ka saiñ pyrkhat kawa rap thymme khnang yow ye u wanrah yei kylla dur ka chnong ka thaw kamjooh ya ka imlang sahlang. Ong chooh chooh u wa katkam i chem wei i yoo yong o samen chem u wa ka chnong Lumputhoi em ha ki ya katæ ka saiñ pyrkhat thymme hanla man ko ka chnong kawa em cha kdong bha leh neibhah da yoo da ki khmat wa phær kani ka chnong na kiwi tawon.
Da ong u leh wa suk bha u pynkylla ya ka imlang sahlang lada em i ya kiwa yahkmat ka chnong da kiwa kreh hok wei kamjooh leh i kohngooh yong ki paidbah wa chong chnong katkam i pynlai chnong.
“Hawa pait O ya ki rukom pynkhreh heiyatoh wow saam Prize cha kiwa jop kamjooh kiwa rem chem O wa toh phær ki na kiwi tawon ki chnong khamtam cha ki para thaaiñ palatsor. Sñiawkmen O chiboon wow yoh kam kani laad wow ya embyntalang ha ka wow pynkut ya kani ka Tournament yong uni u snem deiwa kitbok kitrwiang O ya ka Lumputhoi Sport Club wow nang ku ko chaphrang ha waroh ki liang kamjooh ya waroh artylli ki Club wa da poi cha ka Final wow nangleh bha chooh chooh ki ha ka kaam yalehke yong ki. Hawa yalehke tip i wa em kawi ka naam jop kawi won ka naam rem. Tæ kiwa jop leh ham sñiaw sarong wei kiwa rem leh ham dooh mynsien,” pynkut u Kerlang Ksoo.
Da yoh leh i klam na u Secretary ka Lumputhoi Sport Club uwa da batai yei yumut wa ka thong hawa pynman ya kam kani ka Tournament kamjooh leh da yoh yei klam parom yongrim na u Secretary Chnong uwa da khana kammon sdang u seiñ ya kani ka chnong wei haka won ka dur da booh pyrtuid ya kani ka Tournament kamtai kam wada klam haneiñ.
Ki liang wa poi cha ka Final toh ka Moolamanoh SC wa Mukhaialong SC heiwa ka Moolamanoh SC da pynrem ko ya ka Mukhaialong da 2-0.
Ha kani ka yalehke Final deiwa rah naam jop, ka Moolamanoh da yoh ko ya ka song poisa kawa Rs.70,000 deilang Trophy katwa Mukhaialong won kam ka liang wa rem da yoh ko Rs. 40,000 deilang ka Trophy.
Discussion about this post