Ka North Liberty Higher Secondary School Jowai kawi na ka skur wa da bna bha hapoh Ri-loom Jaiñtia heiyatoh i puræ puthi kamjooh i yalehke Sports lyngba i yoh ksoh yei kyrdan wa chakhmat man-u-snem, ha uni u snem leh kani ka skur najrong wa wan biang ko chakhmat hei puræ puthi, sa hei yalehke District Level Inter-School Athletic Meet 2025 ka West Jaiñtia Hills leh da wan biang ko chakhmat deiwa yohrah yei naam Overall Champion wei yeini i naam da yoh ksoh ko ban ban da boon snem.
Ya kani ka District Level Inter-School Athletic Meet 2025, da pynman ha ki le sngi da ka yung krehkaam u District Sport Officer, West Jaiñtia Hills chirup i krehlang ka West Jaiñtia District Sports Association ha madan Kiang Nangbah Stadium, Jowai, wei da pynkut ya ka ynne ka sngi heiwa u MLA ka Jowai, u Wailadmiki Shylla da man u kam u kongsan wei da chim haroh u ka bynta wow pynhaap pyrda.
Hadien wa da pynbna ya ka North Liberty Higher Secondary Jowai kam kawa jop tam lut waroh namo ka Overall Champion, ki khynnah skur dei kmen da ya chaad ya kyriaw, wei da rah da kyntiñ haroh ki chajrong ya u Principal yong ki, u Richard Uriah.
Ka North Liberty ha uni u snem da yoh rah ko 26 tylli ki takma ksiar, 16 tylli ki takma rupa wa 12 tylli ki takma tama.
Yei naam Best Team ha ki kynthai da yoh nyngkong ka North Liberty Higher Secondary School kawa yoh 17 tylli ki takma ksiar, 9 tylli ki takma rupa wa 3 tylli ki takma tama, bood ka St. Dominic Higher Secondary School kawa yoh kawi ka takma ksiar, 3 tylli takma rupa wa iwi i takma tama.
Yei naam Best Team ki chynrang leh da yoh nyngkong ka North Liberty Higher Secondary School kawa da khur 9 tylli ki takma ksiar, 7 tylli ki takma rupa wa 8 tylli ki takma tama wei bood sa ka Government Boys’ Higher Secondary School Jowai kawa yoh 3 tylli ki takma ksiar, 7 tylli ki takma rupa wa 3 tylli ki takma tama.
Yei naam Best Athlete ha ka Under-14 Boys da yoh u Resource Wellson Sayoo na ka H.K. Singh Secondary School Jowai, ha ka Under-14 Girls won da yoh ka Wanpyntngen Lytep na St. Mary Mazzarello Secondary School Jowai.
Yei naam Best Athlete ha ka Under-16 Boys da yoh u Acharan Talang na ka Government Boys Higher Secondary School, ha ka Under-16 Girls won da yoh ka Saphika Pyrtuh na ka North Liberty Higher Secondary School.
Yei naam Best Athlete ha ka Under-18 Boys da yoh u Yearman Will Rymbai na ka Kiang Nangbah Higher Secondary School katwa ha ka Under-18 Girls da yoh ka Deigracia Dan na ka North Liberty Higher Secondary School.
Yei naam Best Discipline School da yoh ka Little Flower Higher Secondary School, Ummulong.
U Wailadmiki Shylla hawa e yei klam ha kani ka sngi da yaroh u ya kiwa yalehke ka District neibhah wa ha ka 6th Meghalaya Games 2025 leh da man ki kam kiwa jop ha ka Athletics, kamtæ yooluti u wa ha uni u snem yong ka yalehke Inter-School State Level leh daw yoh rah naam jop ki.
Ong haroh u wa ka West Jaiñtia kamwa man katni ym du wa ku ko haka Sports tangwa wot hei puræ puthi kamjooh kamwa da yoo ini wa dep ha ka Result SSLC MBOSE, ka West Jaiñtia yoh ko leh u psiah ha ka kyrdan yong ka thup Top-20.
Heiyatoh wa ka National Games wa daw man ha ka jylla Meghalaya ha u 2027, ong u ka West Jaiñtia Hills District ym chah ieh ko chadieñ neibhah daw yoh bynta ko lyngba i pynman kattu katni ki jait yalehke hapoh kani ka District.
Wei ini daw man i myntoi wa khroo ya ka District heiyatoh wa i chna pynmiat ya ki thaw yalehke, kamjooh leh ya ki seiñ yalehke Sports ka District. Ong u ye leh u pynsakhiat neiwa wan ka Meghalaya Games ini wa dep da chynna boon i myntoi heiyatoh i chna pynbha pynmiat ya ki thaw yalehke.
Ha kani ka sngi da kyntu haroh u ya ki Athletes wym em yoh Medal wow nang khreh chitom chooh chooh ki chakhmat.
Discussion about this post