Jowai: Na ki 40 tam ki dkhot ka Meghalaya State Kickboxing Association (MSKA) kiwa lai chimbynta cha ka WAKO India Federation Cup 2017-18 Cadets, Juniors and Seniors Kickboxing Tournament wa dang dep pynman ha Talkatora Indoor Stadium, New Delhi nadooh ka 16 hadooh ka 20 tarik uni u bnai, na West Jaiñtia Hills District hapoh ka lama ka West Jaiñtia Association of Kickboxing (WJAK) da em 12 ngut wa lai chimbynta heiwa 10 ngut toh kiwa yakhun wa ka wi ka Referee ka Lambhadaka Patlong wa u Coach u Strong Pillar Talang.
Na ki 10 ngut, 6 ngut da yoh ki 8 tylli ki takma heiwa na ki toh ka manbei kawa em arngut ki khon kawa tip kam ka Nisanshwa Lyngdoh kawa em 28 snem i rta kawa yoh ya ka takma tama ha ka kyrdan yakhun wa tip kam ka K1-48 Kgs Senior Women.
Ka Nisanshaw toh kawa naka chnong Shangpung kawa chong dai dukan wei ym toh kawa da biang ha ka puræ puthi tangwa dei kreh chitom da yahkhmat ko leh ya kiwi ki kynthai wa ki leh ye ki u poi palat yeiwa ka de ye ko.
Sa kawi ka kynthai na Shangpung hi ka Anjelin Iakai kawa 20 snem i rta da yoh ko ya ka takma ksiar ha ka kyrdan Musical Form Soft Style Without Weapon, Senior Women wei da yoh ko leh ya ka takma rupa ha ka kyrdan yalehke wa tip kam ka Point Fighting 45 Kg Senior Women.
Kiwi de kiwa na Shangpung wa yoh takma toh u Hame Shaniah Suiam uwa da yoh takma ksiar ha ka kyrdan Point Fighting 57 Kg Senior Men wei da yoh u leh ya ka takma rupa ha ka kyrdan Kick Light 57 Kg Senior Men.
U Heimon Suchiang (17 Snem) uwa na Shangpung hi da yoh takma rupa u ha ka kyrdan yakhun wa tip kam ka Full Contact 54 Kg Junior Boys. Sa uwi na Shangpung toh u Pynbait Wan-I Kanai (18 snem) da yoh u ya ka takma tama ha ka kyrdan Light Kick 51 Kg Senior Men.
Na Jowai u Kamki Kyndiah ha ka kyrdan Full Contact 60 Kg Senior Men da yoh takma tama u.
Ka WAKO India Kickboxing Federation toh kawa tipmit da ka World Association of Kick Boxing Organization kawa da tipmit leh da ka International World Games Association AIMS, WADA & Fairplay kiwa da tipmit won da ka International Olympic Committee.
Ya ka MSKA won toh kawa da tipmit daka WAKO India Kickboxing Federation katwa ya ka WJAK man ko kawa em hapoh ka MSKA.
Ya kiwa lai chimbynta cha Delhi toh kiwa da jied da ka MSKA ha ka yakhun wa pynman ha u Kmaichonglad (Dec) 2017 ha Shillong.
Neiliang ka WJAK da e khublei ko leh ya waroh kiwa da yarap poisa yak i wow ye ki u poi cha ka thong.
Discussion about this post