Khliehriat: Ka Bataw Youth Welfare & Sports Club (BYWSC), Bataw, East Jaiñtia Hills District ynne ka sngi da pynkut ko ya ka yakhun Final yong ka lympung yalehke Football wa tip kam ka 14th Inter Dong Football Tournament 2020 hapyrdi ka Bataw Umstyndong Social Cultural & Sport Club (BUSCSC) pyrchah ya ka Umsoo FC, Bataw heiwa ka yalehke da kut ko mar 0-0.
Hadien wa kut i por da pynman da ka Tiebreaker heiwa ka Umstyndong SCCU da jop ko ya ka Umsoo FC da 4-1.
Ha kani ka Final u Tiewfil Shadap da man u kam u kongsan da yaroh u ya ka Club wa da ye ko u pyndep ya kani ka lympung 14th Inter Dong hanlada em hapyrdi kani ka Khlam COVID-19.
U Waheh Chnong ka chnong, u B. Suchiang uwa da man u kam u symbood kongsan da kyntu u ya ka Club wow em i yatyllilang wow yakrehlang chirup wa ka chnong neibynta u wanrah ya i roi i paar hapoh ka chnong khamtam wow pynku ya ki kaam yalehke Sports.
Ya ka Prize wa ka Trophy cha ka Dong wa jop da saam da u T. Shadap katwa ya ka Dong wa rem won da saam da u B. Suchiang.
Ynne ka sngi da saam leh ya ki Prize samen heiwa ya i naam Best Player da yoh da u Raplang Khongstia, i naam Best Goalkeeper da yoh da u Jopborlang Suchen katwa ya i naam Top Scorer da yoh u Kitbha Lakhi.
Khaddooh ka BYWSC da e khublei ko ya waroh ki 10 tylli ki Dong wa chimbynta ha kani ka lympung wa kamjooh ya ki paaid kiwa kyrchaan ki Dong waphær waphær kiwa wan pynchongchit nadooh wa sdang hadooh wa kut ya kani ka Inter Dong heiwa da man ko kawa lai bait hadooh wa kut.
