Ka lympung yalehke Football wa da pynman da ka Seiñtyllilang Sports & Cultural Club Shangpung Pohchnong ya kawa tip kam ka Under 14 Boys Football League Tournament 2022 da poi ko chawa kut ha ka 16 tarik uni u bnai heiwa da wan sakhi ya ka da u MLA ka thaaiñ, u Comingone Ymbon kam u kongsan wa u president ka MPUF, u Dapoiwanmi Laloo kam u symbood kongsan.
U Comingone hawa e yei klam da yaroh u ya ka Seiñtyllilang Sport & Cultural Club wa da ye ko u pynman kam kani ka lympung neibhah wa wanrah ko ya i akor burom wei wow pyllait ya ki khynnah khynroo na ki kaam sih wa har rukom.
Da klam u leh chaphang i kylla ka suiñbneiñ ha kini ki sngi, wei da ekhublei u ya ka seiñ wa da pdiang burom ko ya kiwa chah khut sñiawbha ha kani ka sngi da ki symbe dieñ.
U Dawanpoimi Laloo da e nongmuna u ya ki khloor yalehke Football na ka jylla kiwa da im ja nei yalehke Football deiwa kyntu leh ya ki paidbah wow pynchlur ya ki khon ki kti wow chimbynta ha ki kaam sports.
Da yoh leh i klam na u waheh chnong ka Shangpung Pohchnong, u Richardson Rabon, wa kiwi kiwi.
Ha kani ka sngi Final ka Dong Lumrangnah Shangpung Pohchnong (DLSP) da jop ko ya ka Shangpung Khliehrangnah Sports Club (SKSC) da i chut Tie-Breaker.
