Ka 29th State Karate Championship da poi noh ko cha wakut ynnin ka sngi deiwa rah ka East Khasi Hills ya ki yalehke ki chynrang wa kynthai.
Kani ka lympung wa ar sngi da pynman ha JN Indoor Stadium wa em ha madan Polo wei da pynman ya ka da ka All Meghalaya Karate-Do Association (AMKA) deiwa kyrchaan ka Directorate of Sports and Youth Affairs ka sorkar Meghalaya wei da wan wow chimbynta da 372 ngut ki Karateka nadooh kiwa em hapoh 10 snem deilang wa ki Senior kiwa da wan na kylleiñ ka jylla.
U kongsan ha kani ka sngi pynhaap pyrda toh u Prof. Dr. C. Daniala, Medical Superintendent ka NEIGRIHMS deiwa emlang kiwi de wa kynthup ya u Meghalaya State Olympic Association (MSOA) General Secretary, u Finely L Pariat, u MSOA Executive Council Member, u Dipshon Ryntathiang wa u Deputy Chief Accounts Officer ka MeECL, u Aiborlang Shabong.
Ki yalehke man ki kiwa biang bha heiwa kini ki Karateka da pynyoo ki ya ka sap yaleh Kata waka Kumite kiwa da yoh yaroh na kiwa da wan wow sakhi yeini nadooh kiwa chah khut sñiawbha, kiwa wan paitke wei kamjooh kiwa ha-yung ha-sem.
Ka Ri-Bhoi kat u dooh wot ko u yoh nyngkong katwa ka West Jaintia Hills da yoh ko hei wa le ha ki kynthai.
Yei naam Best Karateka yong ka Boys’ Division da yoh u Hymnson Challam uwa na West Jaintia Hills wei da yoh u leh yaka takma ksiar ha ka kyrdan Boys’ 13 Years Kumite. Yei naam Best Karateka yong ki Men’s Division da yoh da u Paul Danny Kharmudai uwa na East Khasi Hills heiwa da yoh u leh ar tylli ki takma ksiar ha ka Men’s +60kg Kumite wa haka Men’s Open Kata.
Ha ka Girls’ Division, yei naam Best Karateka da yoh ka Kimjonlhing Silthou na East Khasi Hills kawa da jop leh yaka takma Ksiar ha ka Girls’ 8 Years Kumite. Ka Rebeka Nongspung kawa na East Khasi Hills da jop ko ya ar tylli ki takma ksiar ha ka Women’s-50kg Kumite waka Women’s Open Kata.
Ki Karateka kattu daw pteiñ ki wow pynkhreh neibynta ka 5th Meghalaya Games kawa daw man ha u bnai wow wan ha Tura. Daw em leh kiwa daw pynkhreh yow chimbynta ha ki Tournament wa daw pynman ha baar ka jylla.
Ka AMKA da dep ko wow pynmih palat 200 ngut ki Karateka kiwa da dep jop takma hapoh ka ri wa cha baar ri leh kamjooh ha ki soo phaw snem wa da seiñ ya ka.
Discussion about this post