Kam chibynta wow kyntu wei wow pynku ya ki kaam uiñke suwari, neiliang ka Dorbar Chnong Cham Cham deiwa ya krehlang waka Cham Cham Tourism Promotion Society ini wa dep da pynman ki ya ka tamasa wa tip kam ka Rynji & Sahksaw Festival 2022 heiwa da pynman lang ya ka yakob miat kynthai wa tip kam ka Miss Rynji Falls 2022 ha ka 17 tarik uni u bnai.
Ha kani ka Miss Rynji Falls da wan wow chimbynta da ki 14 ngut ki kynthai na Ri-loom Jaiñtia heiwa da pynman ya ka da le kylla wa kynthup ya ka Traditional Round, ka Casual Round waka Formal Round.
Hawa kut, kiwa bichaar da yoo biang ki wow jied ya ka Firstlin Roy Kam kam ka Miss Rynji Falls kawa na chnong Moolephaw Nongjngi kawa 20 snem i rta kawa lai puræ BA 6th Semester (English Major) ha Kiang Nangbah Government College, Jowai wei da yoh ko leh ya ka song poisa kawa T. 30,000.
Yei naam 1st Runner Up da yoh ka Hakani Phawa kawa na chnong Tuber Kmai Chnong kawa 23 snem i rta kawa kreh kam ka Receptionist ha Wahi Inn 7th Mile Pasyih wei kawa dang lai puræ BA 6th Semester ( Philosophy Honours) ha Kiang Nangbah Government College, Jowai wei da yoh ko yaka song poisa kawa T. 20,000.
Yei naam 2nd Runner Up won da yoh ka Jingieit U Ai Timung kawa 19 snem i rta kawa na chnong Barato wei da yoh ko yaka song poisa kawa T. 10,000.
Ya kani sngi da wan sakhi lang da u Kyrmen Shylla uwa man leh kam u Montri sorkar kamjooh leh u MLA ka thaaiñ kam u kongsan wa u Fineliness Bareh, MDC ka thaaiñ kam u symbood kongsan.
