Ka Iatyllilang SC da jop ko ya ka Khon ka Ri ha ka yakhun Final ka 11th Cash Prize Knockout Football Tournament 2021 wa pynman da ka Moopyniein Socio Cultural & Sports Organization (MSCSO) ha ka 16 tarik uni u bnai.
Ka yakhun yong kini ki arliang mamla man ko kawa yoosuk kawa ya thaiñ bha nadooh ka kylla step hadooh ka kylla miet heiwa ym em wa yoh u thap kool.
Kamtæ neiliang u Referee da rai u wow pynyakhun da ka Tie-breaker heiwa ka Iatyllilang da jop ko da 5-3 ya ka Khon ka Ri.
Ha katai ka sngi leh da em ki chaad tynre na ki khon yong ka dong Moopyniein wa i rwai na u Triberias Dkhar.
U kongsan toh u Mari Dhar uwi na ki waheh na ka thaaiñ Umsning heiwa da emlang u Heipor Bang uwa man u Principal yong ka K.B. Memorial Secondary School, ka Jhanika Siangshai, President yong ka Mahila Congress Committee East Jaiñtia Hills, u Shaniahskhem Dkhar uwa man u President yong ka MSCSO, u Cheerful Ryngkhlem, u Wansuk Shylla deiwa emlang leh ki ar ngut ki Waheh Chnong kitæ toh u Deolang Dkhar yong ka Wapungskur wa u Lening Rymbai yong ka Pamra Paithlu.
