Ka Ri-Bhoi District Sports Association da yoh nyngkong ko hadien le sngi wa pynman ya ka Meghalaya State Senior Athletics Championship 2026 kawa dapoi noh cha wakut ynne ka sngi ha Sports Authority of India Centre wa em ha NEHU Shillong Campus.
Kani ka Championship toh kawa da pynman hadien 18 snem heiwa ka Ri-Bhoi da yoh ko 9 tylli ki Gold, 7 tylli ki Silver wa 7 tylli ki Bronze Medal.
Hei wa ar da yoh ka West Jaiñtia Hills District kawa da yoh 7 tylli ki Gold, 6 tylli ki Silver wa 2 tylli ki Bronze Medal katwa hei wa le da yoh ka East Khasi Hills kawa da yoh 5 tylli ki Gold, 5 tylli ki Silver wa 2 tylli ki Bronze Medal.
Yei naam Best Athlete ki chynrang da yoh u Eliam Bonkam G Sangma na South West Garo Hills katwa ya ki kynthai da yoh ka Phibakmen Rynghang na Ri-Bhoi. Yei naam Most Promising Athlete ki chynrang da yoh u Lastly Suchiang na East Jaiñtia Hills katwa ya ki kynthai da yoh ka Monlangki Kyndait na West Jaiñtia Hills.
Ka kongsan ha kani ka sngi pynhaap pyrda toh ka Glynis Leanne Nunn, kawa yoh Olympic Gold Medal ha ka Heptathlete kawa mihkhmat ya ka Australia ha u snem 1984 ha Los Angeles.
Hawa e yei klam da e mynsien ko ya ki khynroo khyllood deiwa e nongmuna wa ka wan ko na i chnong wa khian bha iwa tip kam i Toowoomba, heiwa katni leh em du 1.5 lak ngut kiwa chong chnong, wei lada ye ko wow poi cha ka Olympics mut i wa kiwon kiwon na ki 267 ngut kiwa chimbynta ha kani ka Championship leh ye ki wow leh yei jooh.
Neiliang won u Meghalaya State Olympic Association Working President, u John F Kharshiing da ong u wa kini ki Medal ymtoh du wow yoh yei chait i khiah, ymtoh leh wa pynsepai yei por tangwa i pynlut yei bor i sor neibynta ka mynried.
Da yooluti u leh wa ha ka National Games wa daw man daw ye u pynyoo pynryngkat yei bor i sor wa kiwi wa em hapoh ka ri deiwa pynrap wa man i kiwa embhah wow yoh ya u Chief Minister uwa bien u pynlut neibynta ki kaam Sports.
Discussion about this post