Jowai: Ka lympung yalehke bol wa hapoh ka rta 15 snem neibynta ki kynthai wa chynrang wa pynman da ka yungkrehkaam u Deputy Commissioner waka yungkrehkaam u District Sports Officer ka West Jaiñtia Hills District da poi ko cha wa kut ynne ka sngi ha Kiang Nangbah Stadium Ladthadlaboh Jowai.
Ha ka kyrdan yong ki kynthai naka Thadlaskeiñ Block da mihkhmat daka Mukhla Raij katwa na Amlarem Block da mihkhmat daka Tympang Club Pdengshakap, katwa haka kyrdan ki chynrang won ka Padu United na Amlarem Block da yachem ko ya ka Rakhui SC Mynsngat naka Thadlaskeiñ Block.
Ya kani ka lympung da tip leh kam ka Sports for Peace and Development kawa haap hapoh ka scheme ‘Khelo India Tournament’ kawa da sdang nadooh ka 14 tarik uni u bnai kawa da chimbynta da ki dhab na waroh ki le tylli ki Block wa haap hapoh ka District West Jaiñtia, wa kynthup yaka Thadlaskeiñ, Amlarem wa Laskeiñ Block, heiwa ya ki yalehke da pynman leh ha ki thaw waphær waphær wa em ha kini ki le tylli ki Block.
Hawa kyruiñ cha ka yalehke ki kynthai hadooh wa kut ka kylla step wei hadooh wa kut ka kylla miet ym em wa yoh u thap kool. Kamtæ ya kiwa jop da rai da ka yachut Tie-breaker heiwa ka Mukhla Raij da jop ko da 2-1 ya ka Tympang Club Pdengshakap.
Haka kyrdan yong ki chynrang won hapyrdi ka Padu United pyrchah yaka Rakhui SC Mynsngat, ka Padu United da jop ko da 2-0 kiwa thap u Nangbha Tariang haka minit wa 15 wa u Mano Tariang haka minit wa 50.
Ya ki khusnaam da saam da u Deputy Commisioner Garod LNS Dykes, u Working President ka WJDSA u EMH Passah, u K. Shylla dkhot ka WJDSA hei emlang u District Sport Officer ka WJH u H. Shangpliang wa kiwi.
Discussion about this post