Ynnin ka 16 tarik, ka Madur Sport Social & Cultural Club, West Jaiñtia Hills District da pynhiar pyrda ko ya ka Inter Dong Football Tournament kawa da sdang nadooh ka 16-12-2020.
Ha kani ka sngi pynkut da em ka yalang wa tbian wa pynlai da u Chairman ka MSS&CC, u Sanbormi Ryngkhlem heiwa u MLA ka thaaiñ, u Wailadmiki Shylla da man u kam u kongsan katwa u MDC ka thaaiñ, u Lakhon Dkhar won da man u kam u symbood chirup i emlang u Nominated MDC, u Octomewot Lamin, u Adiam Bthuh kam kiwa chah khut sñiawbha.
Neiliang u Lakhon Dkhar da ong u wa ka Sport man ko kam ka dawai bah wei katkam wa man katni na ka Sports leh ye ki u yoh khih yoh kreh.
U Wailadmiki kam u kongsan da e khublei u ya ka MSS&CC kawa da ye wow pynman ya ka kani ka lympung ha pyrdi ka khlam COVID-19 deiwa bood ryntih ya ki kyndon sorkar.
Da pyntip u leh wa da yoh ya ka poisa wow chna ya ka sarok chnong khnang wa kiwa uiñke suwari u yoh ki wow pynemkaam khnang wow duna i khynñia ki sarok ha Jowai wei ki paidbah ka chnong leh u yoh kreh ki deiwa booh ya ki dukan dukdoh.
Ya ki kyntien ekhublei da yoh na u Jinot Laloo uwa man kam u Secretary ka Dorbar Chnong Madur.
Ha kani ka yalehke da pynkut da i chut Tie-breaker heiwa ka Khlieh Shnong da jop ko ya ka Pyrdi Shnong da 5- 4 Goal.
