Ka Kwator FT da jop ko yaka Lion SCC Borghat FT da 4-2 lyngba ka yachut Penalty haka Final yong ka lympung yalehbol kawa tip kam ka 3rd Elaka Lakadong Knockout Football Tournament 2023-24 kawa man haka 24 tarik ha Madan Kwator.
Ha ka yalehke Final, ka Kwator FT da yoh chwa ko u thap kool lyngba u Cheerfullness Shadap haka minit 23 katwa ka Lion SCC Borghat da yoh won ko u su kylliang lyngba u Embokmi Rymbai haka minit 30 kawa da pynkut yaka kylla step da 1-1.
Ka yakhun da man biang ko kawa ya ryngkat bor chooh chooh wei kawa yoosuk bha haka kylla miet neibhah pyn arliang da pyrchang ki wow pynkhih yaka jaar tangwa hadooh wa kut i por yalehke da neh bait da 1-1, kamtæ u Referee da rai u e da ka yachut Penalty heiwa ka Kwator FT da jop ko da 4-2.
Da ini i naam jop, ka Kwator FT da yoh ko yaka song poisa kawa Rs. 50,000 ryngkat ka Trophy katwa ka Lion SCC Borghat da yoh ko Rs. 30,000 ryngkat ka Trophy.
Kamtæ ya ki khusnaam samen da yoh u Cherfullness Shadap kam u Top Scorer uwa da thap hadooh 18 kool wei da man u leh kam u Best Player yong kani ka Tournament, u Jefferson Syrti da yoh u yei naam Best Goalkeeper wei waroh ar kini toh na ka Kwator FT katwa yei naam Man of the Match da yoh u Embokmi Rymbai na ka Lion SSC Borghat ha kani ka Final.
Da wan saam ya ki khusnaam da u Dolloi ka Elaka Lakadong, u Oldwing Shadong ryngkat i emlang kiwa kitkaam Sports, ki Waheh Chnong, Secretary Chnong wa ki paidbah wa chong chnong yong ka Elaka.
Discussion about this post