Rah ka Ladthadlaboh SC yei naam jop ha ka 1st Division
Jowai : Ka Ladthadlaboh Sport Club da yoh ko u rah yei naam jop ha ka 1st Division Football League Tournament kawa da pynman daka West Jaintia District Sport Association deiwa pynrem ko yaka Nangbah Mulang Sport Club da 3 laka 1.
Kani ka 1st Division Football Tournament da sdang ko nadooh ka 9 Naikhynde wei da pynkut won ïa ka ha ka ni ka sngi chohthat 24 tarik ha madan Kiang Nangbah Stadium Jowai ha pyrdi yakhun phainal ka Ladthalboh Sport Club pyrchah ïa ka Nangbah Mulang Sport Club, ha kani ka Tournament da wan yachim bynta kamwa 12 tylli ki team na ki chnong wapher wapher ka West Jaintia Hills District.
Ha kynta yakhun ka Ladthalboh Sport Club da yoh chwa ko u pynkhih ïa ka jar da ka kool kawa thap da u Pynbhamiki Ksoo ha ka minit kawa 5, pynbood won sa ka kool kawa ar kawa wan lyngba u Simeon Suchiang ha ka minit kawa 31, kini ki ar kool da neh ki hadooh wa kut ka yakhun yong ka kylla step.
Haka bynta wa ar yong ka yakhun phainal ka Ladthalboh Sport Club da yoh biang ko u thap sa ïa ka kool kawa le kawa thap da u Clinton Suchiang ha ka minit kawa 69, ka Nangbah Mulang Sport Club hadien wa da chah thap ko le kool da sdang ko u yaleh dohyap wow su kylliang ïa ki kool, hynrei ha ka minit kawa 75 ka Nangbah Mulang Sport Club da yoh ko u pynkhih ïa ka jar kawa man ka kool kawa khaddooh kawa neh hadooh wa kut ka kylla miet yong ka yakhun phainal.
Da ki ni ki 3 kool ka Ladthalboh Sport Club da yoh ko u rah yei naam jop yong ka 1st Division Football League kawa e pyrtuit ki ka U Chatis.T Kharkungor Memorial Trophy.
Hachwa ka yakhun phainal da em chwa ka yalang tbian hei pynlai u ma Patrick Lamare Vice President West Jaintia District Sport Association, hei em u ma Marki Mulieh MDC kam u kongsan, u ma E.A.Passah Working President, ki nongchah khut sñiawbha wa kiwi kiwi ki dkhot ka WJDSA.
U ma Marki Mulieh kam u kongsan hawa klam ha kani ka sngi, kyntu kynpham u ïa ki nongyalehke wow em ki ka thong ha ka won ka won ka kaam wa leh ki, heijooh i por kular u wow yakreh lang chirup waka WJDSA nei bynta wow kyntu ïa ki kaam yalehke phutbol ha kani ka District.
Ha kani ka sngi da saam ïa ki khusnaam cha ki ni ki ar team kamjuh leh ki khusnaam samen kam ka Top Scorer da yoh da u Hemanioo Lamare naka Lathalboh Sport Club, ïa ka naam Player of the Tournament da rah da u Simeon Suchiang naka Lathalboh Sport Club, Man of the Match da rah da u Clinton naka Lathalboh Sport Club. Katwa ïa ka naam Best Goalkeeper da rah da u nongyang kool ka Nangbah Iawmusiang SC u Kermi Shylla.
Da saam ïa ka khusnaam cha ka kynhun kawa chahrem kamjooh ka kynhun wa jop phainal da u kongsan u ma Marki Mulieh MDC u wa man kam u kongsan ha kani ka sngi.
Discussion about this post