Ialong: Kamwa 80 ngut ki paidbah hapoh i yahkhmat ka Jaintia National Counsil (EHNC&WJNC) ha ka 24 nai chiphaw, da tia ki hakhmat gate ka Jowai Civil Hospital kawa em ha Ialong.
Ini i wan tia ka seiñ EJHNC waki paidbah nongchong chnong ka chong Tuber toh wow pynman ïa ka yakhih chong kynlaiñ myngor hakhmat ka Jowai Civil Hospital, kam ka dak wow pyrchah i wym chim khia ka bor District wow behkam chipor ïa ki 2 ngut ki nongkreh (Driver & Chowkidar) yong ka Jowai Civil Hospital kiwa emkti wow dat pynmynsoo ïa u Graham Lyngdoh hajrong i pyrchah yong oo, yei leh u Chowkidar heipor wa wan booh u, ïa kawi ka wym chait ha kani ka Hospital kawa da dep jia ha ka miet yong ka 19 u Ñaisaphra.
Hynrei ini i thum yakhih yong ki ym em u lai bait ko neibhah ha kani ka sngi da yang sonteri daki pulit chirup waki magistor soodong kani ka hospital, kamjooh ki bor pynlai District ym em e lad ki yaki wow psiah ki ha pchem kani ka hospital neibhah ong kiwa daw wit daw thut ki wakjut. Ki bor pynlai District da phah ki ïa ka seiñ wow yachem ko wa u DC ha ka sngi wa-ar (Tuesday).
Ki dkhot ka seiñ hadien wada yaklam ki waki magistor, da e lad ïaki wow yieñ harood kani ka hospital du kattu katni por donhi. Ka seiñ hadien wym yohlad u psiah hapoh kani ka hospital, da lai chong kyllaiñ myngor ko kamwa 10 minit ha ka madan ka wa em hajan ka Hospital.
U ma Sambormi Lyngdoh Genaral Secretary EJNC-CB, hawa klam waki nonge khubor da ong u waka seiñ dawa ko naka sorkar wow beh kam chipor kamwa 1 bnai 2 bnai ïa kitu ki bru kiwa ktah kti ïa u Graham Lyngdoh. Hei yatoh wan wei duna kamjooh i emkaam yong ka hospital u ma Sambormi ong u ka seiñ daw pynman ko da ka yalang chong pyrkhat.
Discussion about this post