Ka 2nd St. Joseph’s Secondary School Nongtalang Knockout Football Tournament 2021 da poi ko cha wakut ynnin ka sngi 18 tarik da ka yakhun Final hapyrdi ka KSU War Jaiñtia pyrchah ya ka Lamare SC.
Ha katai ka yakhun Final, ka Lamare SC da yoh ko wow rah yei naam jop da 1-0 deilang waka song poisa T. 3 lak waka Trophy, katwa ka KSU War Jaiñtia da yoh ko T. 2 lak.
Yei naam Top Scorer da yoh u Daman Chyne (Wandikynjai FC), yei naam Best Goal Keeper da yoh u December Khongjoh (Turiap FC), Man of The Match da yoh rah u Kenstar Kharshnong (Lamare SC) katwa yei naam Player of the Tournament da lai cha u Brolinton Warlarpih (Lamare SC).
Ya kani ka Tournament da wan pynhaap pyrda ya ka da u MLA ka thaaiñ u Lahkmen Rymbui uwa man leh u Montri sorkar deiwa ya emlang kiwa kitkaam ka skur, ki bru waheh wa kiwi kiwi de.
