Jowai: Ka khyllood Lameca A Passah wa chong wa sah ha Lumpyrdi Iongpiah, Jowai; da rah ko yei naam jop Miss Jowai 2018-19 napyrdi ki 16 ngut ki khyllood wa ya chimbynta haka yakob wada pynman daka Diza’s Socio & Sport Club chirup i yakrehlang waka District Administration West Jaiñtia Hills District hei janmiet ka 2 tarik u Naichiphaw ha District Library Auditorium, Mynthong.
Lyngba ini i jop ka Lameca da yoh rah ko deilang waka song poisa wa T. 80,000 deiwa yoh ko 817.5 Point.
Yei naam 1st Runner Up da yoh rah ka Asunta Papang kawa na Mookyndeng deilang ka song poisa T. 50,000 deiwa yoh ko leh 780 Point, katwa yei naam 2nd Runner Up da rah daka Warisha Phyllei kawa na Chilliangraij Jowai deilang ka song poisa wa T. 20,00 hajar wei da yoh ko 755 Point.
Ya ki pangchniat neibynta kini kiwa jop da pyndeiñ daka Lincy Dora Challam kawa man kawa jop Miss Jowai wa khaddooh wa pynman ha u snem 2014 wei da pynsñiaw ko leh yei lai luti yong ka ha kitai ki por.
Ka Lameca A Passah hajrong wa yoh rah ko yei naam Miss Jowai da rah haroh ko yei naam Perfect 10. Ka Asunta Papang hajrong wa yoh rah ko yei naam 1st Runner Up da yoh rah ko yei naam Picture Perfect katwa ka Wanrisha Phyllei kawa yoh 2nd Runner Up da rah ko leh ko yei naam People’s Choice wa i naam Most Talented.
Yei naam Miss Congeniality da yoh daka Ofelia Kyndait, katwa ka naam Upcoming Designer 2018-19, næ kiwa stat duh u pynwandur yei riam yong ki khyllood wa wan chimbynta da yoh daka Nidaroi Syntem.
Yei yakob ha kani ka janmiet da pyndep kamwa 4 kylla wa kynthup ya ka Heritage Contestant, Designs Contestant, Style Contestant, waka Elegant Contestant. Hadien ini da jied sa 8 ngut chaka Final round neibynta wow jubab ya iwa kylli wa da e ha ki.
Chwa ini neiliang u kongsan u F.R. Kharkongor IAS Commissioner & Secretary ka Sorkar jylla wa pait yaka tnat Election wa man leh u Chief Electoral Officer da e yaroh u yaka Diza’s Socio & Sport Club wa neipor cheipor pynman ko ya kam kani ka yakob neibynta u kyntu kynrong yei sap ki khyllood, wei da ong u kani ymtoh du kat u jied hi-eh yei miat kynthai tangwa kiwa em i sap wa i thong wow pynemkaam yei naam jop ha ki kaam wa bha.
Da pynchong chit ya kani ka sngi dei rwai, i chaad, kamjooh ka pynyoo rong ya ki riam da ki khynnah kamjooh ki khyllood.
Discussion about this post