Shillong: Ki yalehke Final ka Greater Shillong Meghalaya Baby League da pyndep ya ki ynne ka sngi heiwa ka Langsning Greenergy Lions, ka Rangdajied Eagles waka Onsides Gibbons da jop ki ya ki kyrdan waphær waphær ha kani ka lympung yalehbol kawa sdang ha u Naisaphar 2019.
Ka Greenergy Lions kawa yoh ko yei naam Overall Champions haka MBL 2018, ha kani ka kynti da jop ko yaka kyrdan U-11 wa U-12, ka Eagles da jop ko yaka U-7 katwa ka Gibbons da jop ko yaka U-9.
Ki Champion ka Greater Shillong League daw chimbynta ki haka Final Round ka Meghalaya League, kawa daw kynthup lang ki Centre wa thymme, kitæ ka West Jaiñtia Hills, East Jaiñtia Hills, Ri-Bhoi, West Khasi Hills wa West Garo Hills ha uni u bnai wow wan.
Ynne, ka Rangdajied Eagles (Mawngap Centre) da jop ko yaka Nongthymmai GC Scorpions (Shillong Western) da 2-0 haka U-7, ka Onside Gibbons (Shillong Western) da jop ko yaka Little Kickers FA Ferrets (Mawngap) da 2-1 haka U-9 Final.
Haka U-11, ka Langsning (Shillong Eastern) da jop ko da 2-1 yaka Upper Shillong Colts (Mawngap) katwa haka U-12 Final, ka Langsning da jop ko yaka Rangdajied da 1-0.
U Tata Trusts Head of Sports, u Biswanath Sinha da man u kam u kongsan wei da saam u leh ya ki Certificate, ki Medal wa ki Trophy deilang wa u Meghalaya Football Association Executive Committee Member u Dipshon Ryntathiang wa u Treasurer u Wanshanbor Kharkrang.
Discussion about this post