Ka Lion Sports & Youth Affairs da jop ko da 3 Wicket ya ka Efty United XI Mynso ynnin ka sngi kawa man leh ka yakhun Final ka Open to All Cricket Tournament 2023 wa da pynman da ka West Jaiñtia Hills District Cricket Association ha madan Khliehtyrshi Mini Stadium.
Ya ka kylla-khlem da jop da ka Efty United heiwa da jied ko wow Bat nyngkong wei da lai ko wow kamai 177 Run na ki 33.2 Over deiwa dooh lut ya ki Wicket deiwa kamai boon u Sylvester Mylliempdah 79 Run na 78 bol wa u Sanvert Kurkalang 28 Run na 22 bol. Na kiwa kawang bol ka Lion Sports & Youth Affairs da lehbha da u Deibormi Rangad uwa da yoh 4 Wicket na ki 7 Over, u Peterson Lamare 2 Wicket na 5.2 Over wa u Firstbornson Dkhar 2 Wicket na 3 Over.
Hawa kdong ya ka thong, ka Lion Sports & Youth Affairs da ye ko wow jop du hapoh 28.4 Over deiwa yoh 181 Run wei da dooh ko 7 Wicket deiwa lehbha u Nik Dan 58 Run na 63 bol, u Peterson Lamare 35 Run na 26 bol wa u Firstbornson Dkhar 30 Run na 25 bol. Na kiwa kawang bol ka Efty United da lehbha u Sylvester Mylliempdah uwa da yoh 4 Wicket na ki 7 Over.
Yei naam Man of the Match da yoh da u Deibormi Rangad yong ka Lion Sports & Youth Affairs.
Ya kani ka Tournament da wan wow sakhi da u Sidharth Banerjee kam u kongsan uwa man leh kam u President ka Jaintia Cement Manufacturers Association, chirup wa u Kitbok Rymbai, waheh chnong ka Khliehtyrshi kam u symbood kongsan.
Neiliang u kongsan da e mynsien u ya waroh ki liang kiwa da chimbynta ha kani ka Tournament ha ka yalang wa pynlai da u Vice President, u Isaia Muksor katwa ya ki kyntien e khublei da yoh na u Tournament Secretary, u D. Nartiang.
Ha kani ka sngi da saam leh ya ki khusnaam yong samen cha kiwa lehke kiwa man kamni:
Yei naam Highest Wicket Taker da yoh u Deibormi Rangad yong ka Lion Sports & Youth Affairs.
Yei naam Highest Run Scorer da yoh u Sylvester Mylliempdah yong ka Efty United XI Mynso.
Yei naam Man of the Tournament da yoh u Sylvester Mylliempdah yong ka Efty United XI Mynso.
Da em leh i pynkupburom ya kiwa yalehke kiwa da yoh u mihkhmat ya ka jylla kamjooh leh kiwa da pyndep yei chah sikai kam ki Umpire wa ki kam ki Scorer.
