Ka 2nd North East Olympic Games 2022 kawa 7 sngi dapoi ko cha wakut ynne ha Shillong heiwa ka Manipur da man ko kawa jop boon dooh namo ka Overall Champion sa chisien kamwa da leh ko ha ka NEOG 2018.
Ka Manipur ha kani ka kynti da yoh ko 88 tylli ki takma ksiar, 75 tylli ki takma rupa wa 77 tylli ki takma tama wei hei wa ar da em ka Assam kawa da yoh 79 tylli ki takma ksiar, 61 tylli ki takma rupa wa 63 tylli ki takma tama heiwa kini ki ar jylla hadooh ynnin i miet da yaphær du ar tylli i yoh takma ksiar.
Ka Arunachal Pradesh da ksoh ko yei wa le deiwa yoh 39 tylli ki takma ksiar, 36 tylli ki takam rupa wa 37 tylli ki takma tama.
Ka Meghalaya kawa yoh hei wa ynru ha u snem 2018 da yoh ko ha iwa soo ha uni u snem. Ha u 2018 da yoh ko 3 tylli ki takma ksiar iwa da ku cha 36 tylli ha uni snem iwa mut da ku da 12 chah deilang wa 35 tylli ki takma rupa wa 78 tylli ki takma tama.
Haka yalang pynhaap pyrda da wan kam u kongsan da u Montri Rangbah ka jylla, u Conrad K Sangma, da emlang u Montri ka Sports & Youth Affairs, u Banteidor Lyngdoh, u Montri ka chnat PHE, u Renikton Lyngdoh Tongkhar, u Chairman ka Meghalaya State Planning Board, u Abdus Saleh, u Kimfa Sidney Marbaniang, MLA, u Chief Secretary, u Donald P Wahlang, u Commissioner and Secretary ka Sports and Youth Affairs, u Dr. Vijay Kumar D, u Director General of Meghalaya Police, u Dr. Lajja Ram Bishnoi wa u Secretary General ka North East Olympic Association, u John F Kharshiing.
Neiliang u Conrad hawa e khublei u ya waroh kiwa chimbynta kamjooh leh kiwa emktilang, da ong u wa kani ka North East Olympic Games ym du wow pynku kyrdan ko yei pynkhreh ya ki thaw yalehke, da pynku kyrdan ko leh ya i bor, i sap kiwa yalehke iwa da pynsñiaw sarong ya oo hawa yoo u yeini wa ye ki bru ka North East u leh. Da ong u leh wa i rukom pynman ya kani ka lympung toh iwa man katkam ka kyrdan ha kiwi ki bynta ka ri. Wei yeini da ye wow leh du deiwa yakrehlang waroh kam iwi donhi.
Ya ki khynroo khyllood, da yooluti u wa kani ka lympung da pynyatoh lok ko wei da pynyoh lok thymme wow lehkmen leh yei mahajon haka dustur riti ka thaaiñ North East wei ini waroh daw pynkhreh ko ya ki ha ki luti wa daw lai ki chakhmat.
