Ka Mawlai SC hei sien wa nyngkong da jop ko ya ka Shillong Premier League khlem da hap wow yalehke ynne ka sngi hadien wa ka yalehke hapyrdi ka Langsning FC waka Rangdajied United FC ynne da kut ko da 1-1 ha ka yalehke wa 47 kani ka samoi 2021-22 kawa da pynman ha madan Third Ground, Polo, Shillong.
Ka Mawlai deiwa em 29 Point da tam ko da 7 Point ya ka Langsning waka Rangdajied kiwa waroh ar da yoh 22 Point wei dang em ki ar tylli ki yalehke wa dang sah wei lada jop ki ya waroh ar leh daw ye ki wow yoh 6 Point.
Ka Mawlai hadien wa da sahkut ha ka First Division da boon snem, manda psiah biang chapoh ka Super Division ha uni u snem da rah syndon ko yei naam jop deiwa jop 11 sien, ya drawn 2 sien wei da chah thap du 3 kool donhi.
Ha ka yalehke ynne, u Raikutshisha Buam (20’) da thap u ya ka kool wa nyngkong ya ka Rangdajied katwa ya ka Langsning kawa da yalehke da 10 ngut ha ka kylla miet da thap da u Ronney Kharbudon (78’).
Mynstep ka yalehke toh hapyrdi ka Mawlai (29 Point) waka Ryntih SC (17 Point). Hawa yachem khaddooh kini ki arliang ha ka 14 tarik u Naiynñiaw, ka Mawlai da jop ko da 5-0.
