Ka lympung yalehbol yong ka Nangbah Sports Association (NSA), West Jaiñtia Hills District wa tip kam ka 4th Open to All Football Tournament 2022 dapoi ko cha ka yakhun Final ynnin ka 1 tarik.
Napyrdi ki phaw tylli ki liang wa wan chimbynta ha kani ka lympung kiwa poi chaka Final toh ka Mokaswan Wah FC waka Thubru FC.
Haka kynta yakhun waroh arliang da sai ki yei buit i bor yow yoh pynkhih jaar tangwa katwa joor yathaiñ i yakhun hadooh wa kut ka kynta yakhun leh ym em wa yoh u pynkhih jaar.
Kamtæ yow yoh ya ka rai jop da pynman da ka yachut Tie-Breaker heiwa ka Mokaswan Wah FC da yoh rah ko yei naam jop.
Chwa ini haka yalang wa pynlai da u K. Hinge, Chairman NSA; waroh kiwa e yei klam da e yaroh wei kyrkhu kyrdoh ki ya ka Nangbah Sports Association u nangku ko neipor cheipor.
U District Sport Officer ka West Jaiñtia, u K. Passah khut u yaka Association wow em i yakrehlang wei kyntu u leh u wan mih ki cha ka yung krehkaam yong oo neibynta u yoh ki laad yarap hajrong ka thong u ye pynku yei kaam Sport.
Neiliang u kongsan kani ka sngi, u Lakhon Biam uwa man leh u MDC ka thaaiñ hawa pynkynmoo u ya kiwa yalehbol na ka chnong Nangbah kiwa da bna naam haki por nachwa, yooluti u lyngba ka Nangbah Sports Association daw ye u pynku biang ya ka kaam Sport ha ka chnong Nangbah ki wow mihkhmat ha ka District wa ka jylla neibhah wa boon kiwa em yei sap i phong.
Heijooh i por yooluti u leh lyngba i ya krehlang ki seiñ waphær waphær daw ye biang u rah yei naam i burom ka chnong Nangbah heiyatoh wa ka Sport wei kamjooh leh u ku i roi i paar ha kiwa boon ki liang.
Kiwi won wa e yei klam kynthup ya u President ka WJDSA, u E.M.H. Passah, u Vice President, u Patrick Lamare, u R. Lamare, Adviser NSA, u L.S. Lyngdoh u Karlish Hinge wa kiwi.
Ha kani ka sngi neiliang ka NSA da pynkup burom ko leh ya kiwa yalehke Sport ka chnong kiwa da rah naam haka Meghalaya Games wa pynman ini wa dep, wei da pynchongchit chooh choh ya kani ka sngi dei chaad naki khynnah skur.
