Ka lympung yalehbol wa tip kam ka (L) Kesilroy Pala Invitation Football Tournament 2023 kawa pynman da ka West Jaiñtia District Sports Association (WJDSA) da poi noh ko cha wakut ynne ka sngi da ka yakhun Final Hapyrdi ka Mukhla FC waka Salaroh FC.
Ka Mukhla da yoh ko yei jop da ki ar kool wa da thap da u Primrose Lamat haka minit wa 45+2 wa ka 90+5.
U Primrose da yoh u leh yei naam Man of the Match deilang waka song poisa kawa Rs. 5000 katwa u Aibormiki Suchiang uwa yalehke ka Mukhla da yoh u yei naam Best Goalkeeper deilang waka song poisa kawa Rs. 5000.
Ka Mukla kam ka Champion da yoh ko ya ka song poisa kawa Rs. 5,00,000 katwa ka Salaroh kam ka liang wa rem da yoh ko Rs. 2,00,000.
Ya kani ka yakhun Final da wan wow sakhi da u Symbood Montri Rangbah, Sniawbhalang Dhar uwa man leh kam u khon u (L) Kesilroy Pala deiwa emlang kiwi ki khon u deilang wa kiwa ha-yung ha-sem neitæ u MLA ka Jowai, u Wailadmiki Shylla, ki dkhot ka WJDSA wa kiwi de kiwa chah khut sñiawbha.
Discussion about this post