Ka lympung yalehbol wa tip kam ka ‘1st Inter dong Promotion Invitation Football Tournament-2021’ wa pynman da ka Phramer Youth Cultural & Sports Club (PYC&SC), da poi ko chawa kut ynnin ka 30 tarik ha Madan Ruiong (Phramer), West Jaiñtia Hills District.
Ha kani ka sngi da wan sakhi ya ka yalehke da u MLA ka Sutnga-Saipung Constituency u Shitlang Pale heiwa da em ka yalang chwa wow sdang ya kawa pynlai da u Meliyo Lyngdoh, hei emlang u MDC ka Shangpung u Treilang Suchiang wa kiwi kiwi.
U Shitlang Pale hawa e yei klam da yaroh u ya ki bor pynlai kani ka lympung wow kyntu kynrong ya ki sap ki khynnah ha kani ka jait yalehke.
Waroh ki dhab wa da chimbynta ha kani ka lympung em ki 32 tylli wei ha ka yakhun Final ha kani ka sngi, ka Madanthad Youth Cultural Sports Club (MYCSC) da jop ko ya ka 7 Brother FC da 1-0.
Ka MYCSC da yoh ko ya ka song poisa wa T. 30,000 katwa ka 7 Brother da yoh ko T. 20,000.
Ya i naam Best Goalkeeper da yoh da u Deimiki Rabon, Best player wa Top Scorer da yoh u Ricky Suchiang katwa i naam Best Discipline Team da yoh ka Private FC.