Ka Myntdu Lions da lehbha ko daka Bat yow jop ya ka Final ka Senior Men Challengers Cup ka Meghalaya Cricket Association da 5 Wicket ya ka Nokrek Tigers ha Shillong ynne ka sngi.
U kongsan ha kai ka sngi uwa man leh u Captain warim ka liang yaleh Cricket ka India, u Mohammad Azharuddin da yaroh u yei kdong Run ka Lions wot hapyrdi i pynthut u slap.
Hadien wa jop ya ka kylla khlem, U Captain ka Nokrek, u Sylvester Mylliempdah da jied u wow Bat nyngkong heiwa da kamai ki 220/9 na ki 47 Over. Tangwa heipor chiteiñ sngi da hiar u slap heiwa da pynkylla ya ka thong ka Myntdu cha 133 yow jop na ki 21 Over iwa da ye ki wow kdong ha ki 19 Over deiwa dooh 5 Wicket.
Ka Lions da ka Bat da dooh smat ko ya ki Wicket tangwa da wan u Player-of-the-Final, u Junjun M Sangma uwa da kamai 51 na 31 bol wa kynthup ya 3 tylli ki 6 Run wa 6 tylli ki 4 Run wei deiwa yoh lok wa u Rohit Shah (31) da rah ya ka Myntdu na 29/3 cha 62/4 wei da kamai lang biang u da 62 Run wa u Captain Dippu Ch Sangma (26 Not Out) yow pynjop.
Ha ka yalang saam khusnaam, u Azharuddin ha kani ka sien wa nyngkong wa poi u cha Shillong, da yaroh u ya waroh arliang wei da pynchlur u leh ya waroh kiwa yalehke wow man ki kiwa kreh chitom kiwa tista yow wanrah naam ya ka Meghalaya.
“Lada ym kreh chitom, daw sepai i sap phi neibhah da yoo O ya kiwi kiwa yalehke kiwa hoi bha bar ya nga tangwa ym em chimkhia kamtæ i man kiwa tista wa kiwa chimkhia toh iwa emkaam dooh”.
U Azharuddin, uwa man leh kam u President ka Hyderabad Cricket Association, da ong u wa sñiawkmen u wa ka Meghalaya wa kiwi ki jylla ka Northeast da man ki kam ki dkhot wa pura ka BCCI.
