Ha ka 29 tarik uni u bnai, ka 1st Open To All Knockout Football Tournament wada pynlai da ka Seiñ Pynbaitlang Sport Club (SPSC) deilang waka dorbar chnong Raliang dapoi ko cha wakut daka yakhun Final hapyrdi ka Raliang Wahshnong United SC pyrchah ya ka Lucky FC.
Ka yalehke da kut ko da mar chi kool kawa da thap da u Nidaioh Dhar na ka Lucky FC ha ka kylla step katwa ya ka Raliang Wahshnong United SC da yoh wow thap da u Tyrchainmi Biam ha ka kylla miet. Yow rai ya kiwa jop da pynman da ka yachut Tie-Breaker heiwa ka Raliang Wahshnong United SC da yoh ko yei jop.
Ya kani ka yakhun Final da wan sakhi da u Sports Minister yong ka jylla, u Banteidor Lyngdoh uwa man leh kam u kongsan deilang wa u MLA ka thaaiñ u C. Ymbon uwa man kam u symbood kongsan hei emlang u Dolloi yong ka Elaka Raliang, BDO Laskien Block wa kiwi kiwa chah khut sñiawbha na kiwi tawon ki chnong.
U kongsan hei klam yong oo da e khublei u ya kiwa kitkaam yong ka dorbar chnong Raliang wei da kular u leh u e sñiawbha snem thymme ya ka da ka tnoom waka thaw chong paitke ya ka madan yong ka chnong deiwa ya khrehlang chirup wa u C. Ymbon.
Ha kani ka sngi ya ka khusnaam ya kiwa jop da saam da u kongsan cha ka Wahchnong United SC deilang waka song poisa kawa T. 50,000 ryngkat waka Trophy katwa ya ki khusnaam yong kiwa rem da saam da u symbood kongsan cha ka Lucky SC deilang waka song poisa T. 30,000 ryngkat wa ka Trophy.
Yei naam Best Player da yoh da u Tyrchainmi Biam (Wahchnong United SC) wa Best Goalkeeper da yoh da u Daemitre Dan (Lucky SC).
