Ka Chatister Kharkongor Memorial Trophy 1st Division Football Tournament-2022 ka West Jaiñtia District Sports Association (WJDSA), Jowai dapoi ko cha wakut ynne da ka yakhun Final hapyrdi ka Sailung Ialong waka Mukhla Raij.
Ka yalehke da man ko kawa yathaiñ bha heiwa ya ka kool wa pynjop da thap ha ka minit wa 109 da u Dauruhi Pale yong ka Sailung Ialong yow man ko kam ka Champion ka 1st Division ha uni u snem iwa da mut leh wa kini ki arliang wa poi Final da ku kyrdan ki cha ka Super Division.
Ka Sailung Ialong da yoh ko leh yaka song poisa kawa T. 35,000 katwa ka Mukhla Raij da yoh ko T. 25,000.
Yei naam Man of the Match ha kani ka sngi da yoh da u Bashanbor Pale naka Sailung Ialong.
Yei naam Top Scorer da yoh da u Dauruhi Pale yong ka Sailung Ialong uwa da yoh u thap 10 tylli ki kool.
Yei naam Best Goalkeeper da yoh da u Damangbha Rymbai naka Sailung Ialong katwa yei naam Player of the Tournament da yoh da u Mebakynsai Pale naka Sailung Ialong.
Ya kani ka Final da wan wow sakhi da u Finely Pariat, Hony. General Secretary ka Meghalaya State Olympic Association kam u kongsan deiwa emlang kiwa ha-yung ha-sem u (L) Chatister Kharkongor, u MLA ka Jowai, u Wailadmiki Shylla, u MDC ka JHADC, u O. Lamin, u DSO ka West Jaiñtia Hills wa u DSO ka Ri-Bhoi deilang wa ki dkhot ka WJDSA.
