Nongbareh Lyntiar: Ka Syndai 2 Bro’s FC kawa na Muktapur da khur ko ya i naam jop ya ka lympung yalehke yong ka 2nd (L) Kyrsoh Lamin Memorial Knock Out Football Tournament 2019-2020 wa pynlai da ka Dorbar Chnong Nongbareh Lyntiar.
Ya i naam jop ka Syndai da yoh ko deiwa pynrem yaka Nongtalang FC da ka yachut Tie-breaker (4-2), ha ka yakhun Final kawa pynman haka 7 tarik ha madan yalehke yong ka chnong Nongbareh Lyntiar.
Ha ka tai ka sngi da emlang u MLA yong ka thaaiñ u Lahkmen Rymbui, uwa man leh u Home Minister, Education, Border Areas, Forests and Environment ka sorkar jylla kam u kongsan, u Hat Pohchen kam u synbood kongsan, u Medling Swer kam u Special Guest wa kiwi kiwi de kiwa cha khut sñiawbha nadooh ki waheh chnong, kiwa kitkaam yong ka ASSA wa ki bru rangbah yong ka thaaiñ. Da pynman ya kani ka Tournament kam chibynta wow pynmih poisa yaka chnong.
Ha ka yakhun Final ka Nongtalang FC da yoh ko wow pynkhih jaar nyngkong lyngba u Wuirhen Rymbui ha ka minit kawa 32 kawa da su kylliang ka Syndai 2 Bro’s FC haka minit wa 48 kawa neh hadooh wa kut i por iwa da pynpoi yaka yalehke cha ka yachut Tie-breaker heiwa ka Syndai 2 Bro’s FC da jop ko da 4-2.
Da ini i jop, ka Syndai 2 Bro’s FC (Muktapur) da yoh ko leh yaka song poisa kawa T. 80,000 katwa ka Nongtalang FC da yoh ko T. 50,000 ryngkat wa ki Trophy. Da saam leh ha kani ka sngi ya ki khusnam kyrpang kam ka Best Player of the Tournament cha u Primrose Lamat (Syndai 2 Bro’s FC), Best Goal Keeper cha u Ioannis Lamin (Amkoi SC), Top Scorer cha u Jeffrey (Syndai 2 Bro’s FC) wei Man of the Match cha u Poibiang Pohshna.
Hawa e yei klam, waroh da e ki ya i yaroh yaka Dorbar Chnong Nongbareh Lyntiar kawa da ye u pynman ya kani ka Tournament wei da kitbok ki yaka chnong wow nang ku ko chaphrang ha ki kaam wa bha ha ki snem ki wow nang wan na i bynta i bha i miat yong ka chnong ka thaw.
Kam wow pynkynmoo wa ha kani ka Tournament da wan chimbynta da ki 30 tylli ki dhab yalehke.
Discussion about this post