Ka 1st St. Joseph’s School Nongtalang Football Tournament 2019-20 da poi ko cha wa kut ynne ka sngi da ka yakhun Final hapyrdi ka Turiap FC pyrchah yaka Lia Tu Phrang United FC.
Ha kani ka yakhun Final ka yalehke da man ko kawa chongchit heiwa ka Turiap FC da yoh ko wow rah yei naam jop, ka song poisa T. 2 lak wa ka Trophy, katwa ka Lia Tu Phrang United Fc kawa rem da 4-0 da yoh ko yaka song poisa wa T. 1 lak.
Ya i naam Top Scorer da yoh u Bantei Shylla uwa da thap 6 kool yaka NH6 FC, ya i naam Best Goal Keeper da yoh rah da u Mait Kharumnuid naka Turiap FC, yei naam Man of The Match da yoh rah da u Sheeng Sahktung naka Turiap FC katwa ya i naam Player of The Tournament da yoh rah da u Poibiang Pohshna.
Haka yalang pynhaap pyrda yaka lympung da emlang u u MLA ka thaaiñ u Lahkmen Rymbui uwa man leh u montri sorkar. Ha i klam yong oo da ong u, “Hawa kyruiñ cha ka yalehke kamwa tip i wa ka sorkar Meghalaya da em ko i pynkhreh neibynta wow pynman yaka National Games ha u 2022, wei lyngba kani ka lympung waroh ki thaaiñ ka jylla daw em ki ki khynnah kiwa em ya i sap. Kani toh ka por ya phi wow chim kabu yaki sap ki phong ki yong phi wow pynyoo ya pyrthai ya ki yow man phi u næ kawi, kiwa ye u chimbynta ha kani ka lympung. Kamwa i da yoo i yaka yalehke ynne ka sngi ym toh de kawa yalehke da man ko kawa yaleh sakhiat wei man ko leh ka laad wow wai luti ya waroh kiwa khynroo. Nga kwah O wow kyntu ym du ya ka Football wot ya kiwi ki jait yalehke, kat ha iwa em sap phi wow chim nadooh dohnood khnang wow tyrchaaiñ phi”.
Discussion about this post