Ki pulit ynne i step synyaaw heipor kamwa 1:00 waje da lai kynreh wei da rah ki ya ar ngut ki khynroo kiwa man ki dkhot ka seiñ Khasi Students’ Union (KSU) Shella Unit. Wei ya kini ki art ngut da rah yow takit hajrong i chah bom yap ki ar ngut ki Dkhar ha ka thaaiñ Ichamati ha ka 27 tarik u Wisu.
Uwi na kini kiwa chah rah da tip pyrtuid kam u Shanborlang Shati (26 snem) uwa na ka chnong Wah-Utim, Shella, katwa uwi won ym pu yoh pyrtuid tangwa uwa na ka chnong Saitsohpen.
Katkam wa khana kiwa ha-yung u Shaborlang, ki pulit da lai kem ki ya oo na yung sah u heipor chiteiñ synyaaw wei da pynkit cha thanat ha Sohra wei kattæ da wanrah cha Shillong, wei kini kiwa ha-yung wa kynthup ya ka bei wa u payu dang yang ki ha Sadar Police Station yow yoh yachem wa u khon.
Katkam wa khana yong kini kiwa ha-yung, da ong wa u Shanbor toh uwa kreh mylla ha Ichamati wei da poi yung u chisien chi tayaaw.
Hadooh wa pynmih ya kani ka khubor, ki pulit ym pu em pyntip ki iyi iyi hajrong i chah kem wei dang booddien neibynta ka khubor wa bniah.
Kam wow pynkynmoo wa ha ka 27 tarik u bnai wa dep, ki dkhot yong ka KSU da lai ki wow pynman yaka yakhih pyrchah Citizenship Amendment Act (CAA) ha Ichamati, deiwa thang leh ya ki kyndon kani ka aiñ wei ha katai ka jooh ka sngi ki pulit da chem ki ya ar tylli ki metyap.
Discussion about this post