Ki khynnah yalehke ka West Jaintia Karate Do Association (WJHKA), Jowai kiwa mihkhmat ya ka District ha ka 31st State Tournament Championship wa man ha Shillong nadooh ka 23 hadooh ka 25 tarik uni u bnai da ye ki u rah naam rah burom ya ka District deiwa yoh chiboon ki Medal.
Kani toh ka Tournament kawa pait wa pynlai da ka All Meghalya Karate Do Association, wei ka West Jaintia Karate Do Association (WJHKA), Jowai toh ka sien wa nyngkong wa mih yachimbynta ko hadien wa da pynkhai im biang ya kani ka jait yalehke ha u snem 2024.
Ki bor pait bor pynlai kaka West Jaintia Karate Do Association (WJHKA), Jowai wa kynthup ya u Alan Niangti, President WJHKA deilang u E. Manbha Kynjin, Secretary WJHKA, Jowai dap ki dei sñiawsarong wow yoo wa ki khynnah wa mihkhmat ya ka District em ki katæ ka mynsien yaleh wa ka sap wot hapyrdi i por wa tbian wow yohlaad ki u chah sikai hei pait i yoo ki Instructor wa kynthup ya u Na Oo Mankiwi War Passah, u Ribeit-O Pde wa u P. Chyrmang.
Ki khynnah kiwa da yoh u rah naam rah burom ya ka District ha kani ka 31st State Tournament Championship toh u Esarotmi Sumer wa u Echwami Pyrbot kiwa da yoh Gold Medal, neitæ u Esarotmi Sumer, u Pusaimi i Kyndiah, u Kerda O Pyrbot wa u Ram Kynjin kiwa da yoh Silver Medal katwa kiwa yoh Bronze Medal won toh u Samewa I Pakma, u Pusaimi I Kyndiah, u Kerda O Pyrbot, u Samhame Shylla, u Tulewan Challam, u Chwami Pyrbot, u Ewandaki Laloo, u Hamedeisa Pyrbot, u Da U Ru Langstang, ka Naphi I Dasaki Pakyntein, Ka Iaka-itlang Pakyntein, ka Samha I Mang Sutong, ka Suhakani Dkhar, ka Lasabai Lakiang wa ka Manisha Choudri.
Neiliang u Alan Niangti kam u President hajrong i ye ki khynnah u rahnaam rahburom dap u dei sñiaw sarong wei pynsñiaw u leh i sñiawngooh wei sñiawburom wa khroo ya ki manbei manpa kiwa da pynchlur ya ki khon ki kti yong ki wa ya embynta wa ka Association katwa neiliang won u Ribeit-O Pde khut kyrsu kyntu u ya ki manbei manpa wow e mynsien pynchlur ki ya ki khon ki kti yong ki wow ya embynta ha kani ka jait yelehke kawa e chiboon i myntoi ya ki khynnah neibynta wow yoh yei chait i khiah hei doh i pran wei thij i pyrkhat wa chait wa khlan.
Discussion about this post