Jowai: Ka chnong Namdong-A hapoh i yahkhmat u Waheh Chnong yong ka u Dawan Lyngdoh kawa pynkreh ya ka FARM, Northeast lyngba ka Jaiñtia Hills Development Society (JHDS), da boonkaam bha ko ha kini ki sngi wow pynkhreh yei wan ki 15 tylli ki lok (Partners) ka FARM, Northeast na 7 tylli ki jylla ka thaiñ mihsngi (Northeast).
U Programme Coordinator ka FARM, Northeast u Jimmy R Kharmuti da pyntip u wa i wan yong ki cha Namdong A ymtoh wow wan paitke tangwa man i leh hadien wa tip ki chaphang kani ka chnong ya ki kaam wa bha wa leh ko ha ki rukom synchaar khadar.
Ka chnong da dep chna ko leh ya ka Park wa pyrtuid ka Lumjri Namdong Park wei hapoh kani ka Park da em leh ka kpær thung dawai kynbat wa tip kam ka Traditional Herbal Medicinal Garden wow pynneh pynsah ya ki dawai kynbat.
Ya kani ka park da chna pynmiat bha ya ka du nei pynlut ka chnong kawa da poi cha ki lak tyngka khlem yoh yarap ko neiwon neiwon.
U Waheh Chnong da pyntip u wa emkaam chwa wow pynyoo ya ki dak na ka chnong wa ki tre chnong chim khia wei mantre ki yeiwa sdang ki wei hadien ye u paan yarap na ka sorkar.
Da jied leh ya kawi ka wah wa em hajan ka Park wa tip kam ka Wah Liroh ka Wah Kyntang wei daw chna pynbha ya ki rood yong ka wei wow pynneh pynsah ya kani ka um.
Nalor kini waroh da sdang leh sa ka Herbal Medicine School ka wow sikai ya ki khon khynroo khyllood yow tip ki chaphang i e dawai kynbat yow lait i u wiar jait.
Ha i tai i wan ki dkhot ka FARM, Northeast ha ka 29.07.17 hadien wa dep sakhi ki ya ini waroh kamjooh yei khooid ka chnong, ki Director wa Programme Coordinator na waroh ki 15 tylli ki lok yong ka kiwa wan na ki 7 tylli ki jylla da yaroh ki ya ka chnong.
Hawa kut yong kani ka sngi u Zonal Manager ka Caritas India, u Jonas Lakra uwa pait ya ka FARM, Northeast waroh kawi da pynbna u wa ka chnong Namdong-A toh ka chnong kawa khooid tam hapoh Northeast waroh kawi ha ki chnong wa ka FARM, Northeast kreh ko.
Discussion about this post