Ka State Executive Meeting yong ka BJP Meghalaya Pradesh kawa da man ynne ka sngi kawa pynlai da u State President ka BJP, u Ernest Mawrie da emlang leh u Chuba Ao uwa man u National Vice-President, wa u A.L. Hek uwa man leh kam u National Executive Member da yaroh ki ya u Montri Rangbahdooh ka ri, u Narendra Modi ya ki kaam wa leh u hei wow yakhun ya ka khlam COVID-19.
Da ong leh wa ka Gareeb Kalyan Package wa T. 1.70 lak klur wa da pynbna hapoh 48 kynta nadooh wa krehkaam ka Lockdown ha waroh kawi ka ri wei u khoo rachon wot hapoh ka jylla da khut ya oo kam u ‘Khoo Modi’ pynyoo i wa ka ri da man ko kawa dap wa biang namo ka Atmanirbhar Bharat (Self-Reliant India) wei da e leh ya i tika yada COVID-19 dei mynkna cha waroh kiwa chong chnong ka ri.
Hadien ka Election chiteiñ samoi heiwa ka Party da rem ko, da chim leh ya ka rai wow pyrkhat wow pynjanai chooh ya ki rukom krehkaam ka Party.
Heiyatoh wa ki kaam baam-tooh kamwa da mih cha ki khubor, ka Party da rai ko wow yakhun hadooh wow pyndooh jait ya i kaam baam-tooh wei wow kreh ya ka thong yong ka Party.
Da ong wa ka Congress da mut sih bait ko ya ka Party wow pynbaad ya ka kam ka Party niam wa ki jaitbru khamtam heipor Election tangwa kamwa ka ri yieñ ko ka Party leh u kreh ko wei wow yada salonsar ya waroh.
Da chim leh ya i rai wow pynchlur ya kiwa kreh ka Party wow kreh bha neibynta i jop ha ki Election wow wan khnang wow pynduna ya i thut krehkaam ki chnat sorkar.
Ka Party da rai ko leh wa kamwa man ha kani ka kynti, daw pyntikna wa ka Party u poi ko hei bor ha ka jylla.
Heijooh i por ka Party da rai ko wow pynwiar ya i artatien ki paidbah wow chim ya i tika yada COVID-19 iwa em hapydi ki paidbah yong ki District ka jylla.
Heiyatoh wa i pynkrehkaam ya ki Scheme ka sorkar pyrdi da rai wow booddien ya ki hapoh ka jylla wei ini daw yarap i ya ka jylla wow pynman ya ka Meghalaya kawa yoh wa laa khamtam wa daw dap ko 50 snem ha ka 21 Duyatra 2022.
Heijooh i por da rai leh wow pynkhlan chooh chooh ya ka Party ha ki Social Media wow poi wow kynjoh bha cha ki paidbah.
Ka BJP Meghalaya Pradesh da pdiang ko leh ya i khut sñiawbha u Narendra Modi ya u Pope Francis wow wan cha India.
Hajrong ka thong yong ka Party wow kreh neibynta kiwa tymbuiñ wa kiwa duna hei yoh i laa ha ka ri, ka BJP Meghalaya da ekhublei ko ya kiwa kreh ka Party kiwa da kreh khlem chong kli-kti wot hapyrdi wa wan ka khlam COVID-19 ha ki ar snem wa da lai deiwa ong wa heipor wa kiwi ki Party ymbien ki wot wow mih na yung, kiwa krehkaam ka Party da mih ki u yarap wei wow kyrchaan ya kiwa emkaam la hei marbaam wa kiwi ki jait emkaam yong ki bru.
