theme-sticky-logo-alt
theme-logo-alt
Advertisement ad1

Jan chah tlep ka wah Myntdu wym krehkam ki hukum yada ka sorkar

Advertisement ad1
Advertisement ad1

Ka wah Myntdu wa kær soodong ya ka chnong Jowai, wei kamjooh leh kawa psa umbaam umdih ya kiwa chong chnong. Da chem toh kawa da jngud palat katkam i chem ka chnat saam umbaam umdih (PHE) Electrical ha ki kajiak bnai wada lai hadien i chim nongmuna ya ka um na Oorkhla wa na Dam Mupiah. Katni won kani ka wah da jan chah tlep ko hei bynta ka Treiongriang lyngba i yohlaad kiwa kreh pynheh ya u sarok Jowai-Dawki u pynkai ya ki moo ki khyndaw wei kamjooh leh i wym krehkaam ki kyndon aiñ wa ka sorkar da pynkrehkaam ko neipor cheipor. 

Kamtæ ynne ka sngi neiliang ka seiñ Khooid Yaka Wah Myntdu hadien i yoh ujor naki paidbah da lai hiar ko cha katai ka thaw yow sakhi dei khmat wei da chem ko leh yei sakhiat.

Advertisement ad1

“Wym tip de kammon u ong, neibhah ka umbaam umdiah ha Dam Mupiah leh da ktieh wei sa ini heini da jan wiar, neiliang u DC da pynkrehkaam u ya ka Section 144 CrPC leh wym em leh u iyi iyi  hajrong ini, neiliang ka MUDA, ka Water Resource waka chnat krehkaam waphær waphær leh ym em leh ki iyi iyi wot ka District Council wa pait ya ki um ki wah kamjooh,” ong u Khroo Lamsalanki Pariat, President ka Khooid Yaka Wah Myntdu.

Ini i leh toh wada tynyap yei sñiaw yong ki bru wa em ha soo dong ka Jowai, wei kam kiwa chaniah umbaam chaniah la-ær na kani ka wah wymtip de yi wow jia neibhah neini chakhmat daw wan ban sei jynjar. 

Chooh chooh ong u ini i chem ki da man i iwa sñiawsih wa khroo tam, neibhah wa u Contractor, u Ngaitlang Dhar da tyngkheiñ u yei kular wa dep kular u hakhmat yong ki iwa da ong u wym e laad de uwi wot leh u moo wow haap chei bynta ka wah Myntdu, wei neiliang ka yung krehkaam u Executive Engineer PWD Road Jowai Central Division kawa toh u pait leh wym em leh ko iyi iyi. 

“Dang ini wa dep yoo i wa kiwa yahkhmat ki ri ka pyrthai ong ki emkaam wow pynneh yaka rymaw ki dieñ ki siej khnang yow yoh ka umbaam umdih, tangwa i won ha Jowai jia dei kaini najrong wa sa katwon da poi ka pyraw,” pynrap u Pariat.

Neitæ hawa kyntu u ya waroh kiwa chong chnong ka Jowai wow yakrehlang neibynta i yap i im, ong haroh u wa lada pait heini rukom yoosar wym em sorkar de. 

Puræ leh: Kular u Contractor wym pynkai khyndaw de cha ka wah Myntdu

Share this:
Previous

Sdang ka 1st Saba Knock-Out Tournament 2021 wow wanrah ya i yakrehlang wa ka Assam

Next

Rai ka BJP kreh hadooh wow yoh u synchaar ya ka jylla