Ka Environmental Coordination Committee (ECC) ka Elaka Sutnga ynne da chim ko ya ka rai ko wow pynkrehkaam da 9 tylli ki mat krehkaam pyrchah ya ki karkhana Coke wa krehkaam pyrchah ya ka aiñ hadien wa ka sorkar ym bien ko wow bood ya ki hukum ka National Green Tribunal (NGT).
Kam wow pynkynmoo wa ka NGT ha ka 08-07-22 da pynmih hukum ko wa ka sorkar toh u leh ko yeiwa emkaam yow pyntikna wa ki karkhana Coke kiwa da yoh bor chwa ka 23-12-20 hap ki wow bood lang ya ki kyndon wa da pynmih ka MSPCB ha katai ka tarik wei wow wanrah ki kyndon kammon wa kini ki karkhana kiwa da yoh bor wow krehkaam wa hap ki wow bood ya kitai ki kyndon.
Neiliang ka NGT da e por ko ya ka sorkar jylla kamjooh ya ka MSPCB soo bnai wow leh yeini.
Neiliang uwa e buit ka ECC, u Reading War da ong u waw pynkrehkaam ki da ki 9 tylli ki mat krehkaam hadien wa da yang ya ka sorkar wow bood ko ya ki kyndon ka NGT la ar bnai.
Da ong u wa kopsar ka sorkar yoh thiah ko neibhah ym pu em pynkhreh ko kiyi kiyi wow leh katkam wa da phah da ka NGT wow pyndep u pynkhreh ha ka tayaw wa nyngkong u Khonchonglad (Nov) uni u snem, kamtæ ym yohsa wow chim yei kaam ha kti yong ki.
Ka ECC da ong ko wa kawi na ka mat toh wa waroh ki karkhana Coke kiwa da krehkaam chwa u Kmaichonglad (Dec) 2020 hap ki wow yoh ya ka Consent To Operate (CTO), wei ki wym ye u bood ya ki kyndon toh u khang noh ki chwa u kut u Khonchonglad (Nov) 2022.
Lada kyrriah thaw ki cha wi, ym toh u chah u krehkaam ki hapoh u pood u ang ka Elaka Sutnga.
Ka sorkar ym toh leh u pynbna ko ya kiwon kiwon ki thaw kam ki wow booh karkhana hapoh ka Elaka Sutnga lada man katwa man leh.
Ym toh u chah u krehkaam ki karkhana kiwa emlang chi thaw wei kiwa em samen ym toh u chah wow pynkylla ki cha kiwa em boon tylli chi thaw.
Ym toh leh u e bor u krehkaam ki karkhana Coke wa thymme hapoh ka Elaka ha ki por wow wan.
Hadien wa kut ini i por wa da e, waroh ki karkhana kiwa krehkaam pyrchah aiñ toh u tympra noh ki wei wow pynbha pynmiat ya i thaw wa em ki yow man kamwa jooh hi.
Ka poisa wa da phah wow su kini ki karkhana kiwa em 31 tylli yow pynim biang ya ki soodong sookun ki chnong ki thaw kawa da poi hadooh T. 5.5 klur toh u pyndep u su chwa u Khonchonglad.
Ya kani ka poisa toh u e cha ki chnong wa da chah ktah ha ki karkhana Coke yow ye u pynim biang ya ka rymaw kamjooh i rukom im ki bru ha waroh ki chnong kiwa chah ktah.
Puræ leh: Ym toh u yada ka sorkar ya ki Coke Factory wa tyngkheiñ aiñ: NGT
