Ka seiñ Assam Driver Association da rai ko wow sangeh u kamai cha Guwahati–Shillong wa Shillong–Guwahati hadien wa chah thombor ki kari Assam heipor wa pynman ya ka Bike Rally da ka Khasi Students’ Union (KSU) ha ka 19 tarik.
Ha Jorabat, da em da ki spah ngut kiwa kamai na Assam wa pynsangeh ya ki kari wa lai cha Meghalaya kamjooh kiwa wan cha Assam wei da chah du kat ya ki kari wa jhan kam ki Ambulance donhi.
Ka Association da ong ko wa da chim ya i rai neidaw wym chngaaiñ i lai i wan ki kari wa em Number Assam deiwa beiñ leh ya kiwa thombor ya ki kari ha ka 19 tarik deiwa pynrap wa waroh em ka hok wow pynman yakhih tangwa ym em won wa em hok wow tba kti, wow pyntieñ wei wow tympiah ya ki kari ki bru.
Ka seiñ da dawa ko leh wow paan maap u Chief Minister ka Meghalaya kamjooh u Transport Minister na ki paidbah ka Assam kiwa chah ktah wei wow su leh ya ka bai lutsan.
Da dawa leh wow kem wei pynchitom ya kiwa emkti wei wow e ka sorkar Meghalaya dei thoh wa chngaaiñ kiwa na Assam wow wan cha ka jylla.
Ka Association da pynche ko leh wa i yakhih ymtoh pyrchah ya ki jaitbru næ ki seiñ kamjooh ki paidbah ka Meghalaya tang wow beiñ donhi yeiwa jia ha ka 19 wei u pteiñ ini i yakhih ki kat wym pu yoh yei hok.
Da kyntu leh wow em i suk hapyrdi ki paidbah ka Assam wa Meghalaya.
Discussion about this post