Ka University Grants Commission (UGC) da rai ko wow pynman ya ka Exam Final Semester kamwa da e yumut da ka chnat puræ puthi ka jylla, wow sdang nadooh ka 7 hadooh 16 tarik Naichiphaw wei ya ka Result da rai wow pynbna chwa wow kut u bnai.
U Lahkmen Rymbui da ong u wa ini i rai ka sorkar toh hadien wa da yoo ko yei sñiaw ki khynnah puræ neidaw i chah ktah ha ka khlam COVID-19.
Kam wow pynkynmoo heini, ka UGC da pynmih ko ya ka hukum ha ka 7 tarik u Naiynñiaw wa toh u pyndep ya waroh ki Exam UG wa PG chwa wow kut u Naisaphra uni u snem, tangwa neidaw wa pyrchah kiwa boon, kani ka kaam da poi ko cha yung kasari heiwa ka Supreme Court da pynksan ko ya ka UGC, deiwa elaad leh ya ki sorkar jylla wow thoh ki cha ka UGC wow pynyinsur ya ka tarik Exam.
U Lahkmen da ong u wa ka sorkar hadien wa da phyllu yumut bha wa ki bor pynlai ka North Eastern Hill University (NEHU) da e yumut noh ko cha ka UGC wow pynman ya ka Exam Final Semester ha ka 7, 9, 12, 14 wa 16 tarik u Naichiphaw deiwa pynrap wa ya ka Exam daw pynman deiwa bood thij ya ki kyndon wa da booh ka chnat i chait i khiah.
Ye leh wow pyntip heini wa waroh ki khynnah ki wow yakhun ya ya kini Exam em ki palat 24,000 ngut, kiwa kynthup ya kiwow leh ya ka Final Semester ha ka PG du na ka jylla em ki 1300 ngut katba kiwa na baar em ki kamwa 700 ngut, wei kiwa hap yakhun ya ka UG em ki 19,000 ngut na kani ka jylla wei kamwa 3000 ngut na baar jylla.
