Shillong: Ki montri yong ka sorkar Meghalaya Democratic Alliance (MDA) da rai ki wa ki montri ha kani ka sorkar u noh kyllooid mynsien ki cha ka Chief Minister’s Relief Fund (CMRF), neibynta wow yarap cha kiwa chah ktah ha i chlai um kawa da jia ha ka jylla na i joor yong u slap bah ha ka tayaw wa da dep.
“Waroh ki montri ka sorkar u yarap poisa ki cha ka CMRF neibynta wow yarap ya ki paidbah wa chah ktah ha ka chlai um,” ong u Home Minister, u James Sangma hawa yaklam hadien ka yalang ki montri deiwa kyntu leh ya ki paidbah ka jylla wei kamjooh ki MLA ka liang pyrchah wow ksohkti lang ki ha kani ka yarap poisa.
“Kani ka yarap ym man ko du neibynta kani ka chlai um, u man ko leh neibynta wow pynkhreh lupa lada wan kawon kawon i chah pynjæd chah tympra ha ka rymaw ha ki por wow wan,” da ong u James.
U montri da pyntip u leh wa ka sorkar jylla da paan yarap ko leh na ka sorkar pyrdi, wei neiliang u montri rangbah, u Conrad K Sangma dang ha kni ki sngi da yachem u wa u montri ka kaam pohyung ka sorkar India wei kamjooh wa kiwi ki montri ka sorkar pyrdi. “I kyrmen i wa ka sorkar pyrdi daw yarap kyllooid ko ya ka jylla,” da ong chooh chooh u.
Hawa kylli, lada ka sorkar em ko i thmu næ ym em wow pynbna noh ya ka ri-loom Garo Hills kam kawi na ki thaw wa chah ktah joor ha ki bor rymaw na i chlai um, neiliang u James da ong u wa ka sorkar ka emkaam ko wow bichaar bniah bha chwa wow chim ya kawon kawon ka rai.
Da pyntip u leh wa ka um nadooh wa joor u slap ha ka thaaiñ Garo dang yoo chyrkhei wei hadooh katni ym pu em hiar ko.
U montri da pyntip u leh wa neiliang ki bor District hadooh katni dang pyrchang ki wow pynpoi ya kiwa emkaam cha kiwa chah ktah deiwa pynbiang ya ki thaw sah wa chipor ya kiwa da hap wow yut chnong na ini i chlai um.
Hawa jubab chooh chooh ya i daw wa chlai um, u James da ong u, “I joor yong u slap bah ha ki sngi wa da dep da pynman ya ka um wa wan na ka wah Brahmaputra wow tyllep ko cha ki them yong ka Garo Hills, kawa man kawi na ki daw wa chlai um ha ka thaaiñ.”
Discussion about this post